भक्तपुर बचतमा सकियो एक महिने नाटक लेखन तथा अभिनयकला
- Post Date 2024-09-22 04:44:47
भक्तपुर, ५ असोज
भक्तपुर बचत तथा ऋण सहकारी संस्था लि.को सांस्कृतिक उपसमितिको आयोजनामा नाट्यकर्मी समाज नेपालको प्राविधिक सहयोगमा भएको एक महिने नाटक लेखन तथा अभिनयकलाको शनिबार समापन भएको छ ।
कार्यक्रममा नेपाल मजदुर किसान पार्टी भक्तपुर जिल्ला समितिका अध्यक्ष एवं वागमती प्रदेशसभा सदस्य सुरेन्द्रराज गोसाईले देश र समाजको क्षेत्रमा यस तालिमले महत्वपूर्ण योगदान पु¥याउने बताउनुभयो । उहाँले अभिनयसँगै जीवन सार्थक बनाउन निरन्तर अध्ययन गर्नुपर्नेमा जोड दिँदै कलापक्ष र नियमित अन्तरक्रिया र गोष्ठी भएमा त्यसले जीवन्तता प्रदान गर्ने बताउनुभयो । विषय छनोटमा बुद्धि र विवेक पु¥याउनुपर्ने बताउँदै उहाँले पूँजीवादको जग भ्रष्टाचार भएकाले त्यस व्यवस्था विरुद्ध कलम चलाउनुपर्नेमा जोड दिनुभयो । उहाँले राष्ट्रिय अन्तर्राष्ट्रिय क्षेत्रमा गरेका अन्याय अत्याचार, दमन र उत्पीदनलाई कथाको विषयवस्तु बनाएमा नाटकले देश र समाजको सेवा गर्ने बताउनुभयो । साहित्य र विचार पक्षमा जोड दिँदै उहाँले सुन्दर समाज निर्माणका लागि नाटक क्षेत्रले महत्वपूर्ण भूमिका निर्वाह गर्ने बताउनुभयो ।
संस्थाका अध्यक्ष निर्मल प्रजापतिले यस तालिम सामाजिक उत्तरदायित्वकै सिलसिला भएको चर्चा गर्दै संस्थाले समाज र सदस्यका लागि सामाजिक, सांस्कृतिक, शैक्षिक, स्वास्थ्य, खेलकुद र अन्य सामाजिक महत्वका विविध क्षेत्रमा लगानी गरिरहेको बताउनुभयो । उहाँले संस्थामा वित्तीय अनुशासनलाई कडाइ गरिरहेको बताउँदै संस्थाका पदाधिकारीहरु व्यक्तिगत आर्थिक प्रलोभनमा परी काम नगरेको स्पष्ट पार्नुभयो । संस्थाले दिएका तालिमहरुलाई लिपिबद्ध गरी संग्रहित पुस्तक र कृति प्रकाशनमा जोड दिइरहेको चर्चा गर्दै संस्थाले दिएको यो तालिम नितान्त नौलो भएको बताउनुभयो । उहाँले प्राप्त सीप र ज्ञान समाज र सदस्यको लागि उपयोग गर्न जोड दिनुभयो ।
प्रशिक्षक लक्ष्मी नारायण चवालले हरेक कलाकारले आचारसंहिताको पालना गर्नुपर्नेमा जोड दिनुभयो । उहाँले पर्दा भित्र र बाहिरको भूमिकाबारे स्पष्ट पार्दै तालिममा एउटै विषयमा ३२ वटा कथा तयारी भएको बताउनुभयो । साथै नेपाल भाषा साहित्य तःमुंज्या(सम्मेलन) नाटकीय क्षेत्रमा उत्कृष्टता प्रदर्शन गर्न यस तालिमको विशेष भूमिका हुने बताउनुभयो ।
आयोजक समितिका संयोजक नारायणी खोंजुको सभापतित्वमा भएको उक्त कार्यक्रममा प्रमुख अतिथिबाट प्रशिक्षार्थीहरुलाई प्रमाणपत्र वितरण गर्नुभएको थियो । प्रशिक्षार्थीहरुको तर्फबाट ‘से नो टु ड्रग्स’, ‘नाताबाद स्वाहा’ र ‘ड्रग्स एडिग्सन’ नाटक मञ्चन भएको उक्त कार्यक्रममा आयोजक समितिका सदस्य प्रज्वल प्रजापति, उज्वल ह्योंगजुले पनि बोल्नुभएको थियो । लक्ष्मी नारायण चवाल र जय प्रजापतिले दिएको उक्त तालिममा ३१ जना सहभागी रहेको थियो ।
...
All Comments.......
Please Login/Register To Comments