छेँ जग्गा व सम्पत्ति कर बुझेमयाःपिं २० म्ह तःधंगु करदाताया छेँ व ज्याकुथिइ राजश्व विभागं माइकिङ
- Post Date 2021-07-28 12:10:23
कृष्ण प्रजापति
येँ महानगरपालिकायात छेँ जग्गा व सम्पत्ति कर बुझेमयाःपिं २० म्ह तःधंगु करदाताया छेँ व ज्याकुथिइ राजश्व विभागं माइकिङ न्ह्याकूगु दु । माइकिङलिसें वंगु असार १६ गते कर पूवयेगु नितिं स्वीन्हु (३० न्हु) या सार्वजनिक सुचं जारी याःगु खः ।
माइकिङलिसें क्वःछ्यूगु ईया दुने कर पुलेत मवल धाःसा वधुंकाः छेँ, पसः व व्यवसाय शिलबन्दी यायेगु व सरकारी ल्यंदूगु सरह राजश्व असुली यायेगु सम्बन्धी सुचं टाँस याःगु दु । राजश्व विभागया प्रमुख डा. शिवराज अधिकारीं धाःगु दु, ‘थ्वसिबें न्ह्यः जिमिसं वय्कःपिन्त सम्पर्कय् हयेत आपालं कुतः याना । इनाप याना । तर, वय्कःपिन्सं विवरण तकं नं बुझेमयात ।’ वया कथं न्हापांगु चरणय् नां सार्वजनिक याःपिं नीम्ह करदातामध्ये थौंतकया दुने वडा ११ या एनआरटी क्लब, वडा १३ या काठमाडौं इन्जिनियरिङ्ग कलेज, वडा ४ या देवेन्द्र श्रेष्ठ सम्पर्कय् वःगु दु । ल्यंदुपिन्सं सम्पर्क नं याःगु मदुनि । उपिं करदातापिन्सं थः सम्बन्धी विवरण बुझेमयाःगु हुनिं यकिन अंक धायेत थाकूगु वं धाःगु दु । वं धाःगु दु, ‘तर, जिमिसं थ्यंमथ्यं ७० करोड तका दांसिबें अप्वः राजश्व प्राप्त याइगु अनुमान याःगु दु ।’
राजश्व अधिकृत प्रदीप कोइरालाया नेतृत्वय् नगर प्रहरीलिसें वंगु पुचलं थौं बुधवाः वडा ११ या एनआरटी क्लब युनाइटेड वर्ल्ड ट्रेड सेन्टर, वडा १२ या बागमती च्याम्बर व बुद्धबारी कम्प्लेक्स व वडा १३ या काठमाडौं इन्जिनियरिङ्ग कलेज व नेपाल रेडक्रस सोसाइटीइ काइकिङ यायेगु ज्या व सुचं टाँस यायेगु ज्या याःगु दु । महानगरयात करया विवरणतकं बुझेमयाःपिं मेपिं करदाताय् वडा १४ या आदर कम्प्लेक्स, कृषि सामाग्री संस्थान व एलआरआई स्कूल, वडा १५ या मनमोहन मेमोरियल कलेज एण्ड शिक्षण अस्पताल, वडा ३ या कान्तिपुर डेन्टल अस्पताल व चिरायु अस्पताल व वडा ४ या देबेन्द्र श्रेष्ठ खः । अथेहे, वडा २२ या आरबी कम्प्लेक्स, वडा २४ या सुरज आर्केट, वडा २९ या शुभश्री कोअपरेटिभ लिमिटेड, वडा २८ या काठमाडौं प्लाजा व नेपाल सेयर मार्केट व वडा ३० या गोपालजी प्रपर्टिज प्रा.लि. व स्टार मल खः । उपिं करदातापिन्त कर पुलेत ब्यूगु म्याद साउन १५ गते क्वचाइ ।
All Comments.......
Please Login/Register To Comments