क्लिनिकं न्यानाः हःगु वासः नयेखतं तता व किजा सित
- Post Date: 2021-08-04 11:29:06
कृष्ण प्रजापति भारतया दिल्लीइ च्वंगु छगू क्लिनिकं न्यानाः हःगु वासः नयेखतं निम्ह नेपाःया मचात सीगु दु । दिल्लीया शालिमारबागय् च्वनाः वयाच्वंपिं नेपाःया बाजुराया बुढीगंगा नगरपालिका ५ या मानबहादुर बिकया खुदँ दुम्ह म्ह्याय् लक्ष्मी व स्वदँ दुम्ह काय् विशालया ज्यान वंगु खः । बान्ताया समस्या खनेदयेधुंकाः सोमवाः स्थानीय शुभम डाइग्नोसिस सेन्टर नांया क्लिनिकय् वनाः वासः न्यानाः विक नं काय् व म्ह्याय् निम्हेसित वासः नकूगु खः ।
क्लिनिकया डा. बेदकुमार गर्गं ब्यूगु उगु वासः नयेधुंकाः १०÷१० मिनेटया फरकय् निम्हं तताम्ह व किजाम्ह सीगु अखिल भारत नेपाल एकता मंचया केन्द्रीय सचिव आरबी खड्कां जानकारी ब्यूगु दु । मचात सीधुंकाः डाक्टरया नामय् विकया छेँजःतय्सं स्थानीय शालिमारबाग प्रहरी स्टेशनय् उजुरी बियाः डाक्टरयात कारवाहीया माग याःगु खड्कां धाःगु दु । अखिल भारत नेपाली एकता मंचया ग्वाहालिं छेँजःया दुजःतय्सं डाक्टरविरुद्ध उजुरी ब्यूगु खः । आः उम्ह डाक्टरयात प्रहरीं निगरनीइ तःसां नं नियन्त्रणय् मकाःगु पीडित पक्षं धाःगु दु । सीपिं निम्हं मचातय्गु मंगलवाः हिन्दु संस्कार कथं अन्त्येष्टि याःगु खः ।
-
Shares
All Comments...
Please Login/Register to comment.