- Post Date 2021-08-09 03:21:10
कृष्ण प्रजापति
येँ महानगरपालिकां घरजग्गा व सम्पत्ति कर मपूपिनिगु थप ५२ म्ह करदातायात स्वीन्हुया सुचं बियाः नां सार्वजनिक याःगु दु । थ्वसिबें न्ह्यः २० म्ह करदाताया नां सार्वजनिक याःगु खः । कर मपूपिनिगु धलखय् स्वास्थ्य राज्यमन्त्री उमेश श्रेष्ठया लगानी दूगु जनमैत्री अस्पतालनिसें व्यवसायी अजेय राज सुमार्गी तकया नां दु ।
नेपाल विद्युत प्राधिकरण, खाध्य संस्थान, साझा भण्डार, राष्ट्रिय नाचघर, कर्मचारी संचयकोष लिसेंया सरकारी व सार्वजनिक निकाय व संस्थानं नं कर पुलेत अटेरी याःगु महानगरपालिकां जानकारी ब्यूगु दु । महानगरपालिकाया राजस्व विभागं ताःई न्ह्यःनिसें वडापाखें जूगु ताकेतायात अटेर याःगु हुनिं नां सार्वजनिक यायेमाःगु जानकारी ब्यूगु दु । विभागया प्रमुख डा. शिवराज अधिकारीया कथं नां सार्वजनिक याःपिं करदातां स्वीन्हुया दुने करया विवरण, कर व जरिवाना मपूसा सेवा बन्द यायेगु, सम्पत्ति रोक्का यायेगु लिसेंया कानूनी प्रक्रियापाखें सरकारी बाँकी सरह कर असुल यायेगु धाःगु दु । अधिकारीया कथं थ्वसिबें न्ह्यः १६ गते नां सार्वजनिक याःपिं करदातामध्ये आपालं सम्पर्कय् वयेधुंकूगु दु । गुलिंसिनं न्हापांगु किस्तावापत कर पूगु दुसा गुलिंस्यां सम्पत्ति विवरण लःल्हाःगु दु ।
सम्पर्कय् वःपिन्सं ई माग यानाः कर पुलेत मञ्जुर याःगुलिं मौका ब्यूगु दु । उपिंमध्ये सुं सुं सम्पर्कय् वःगु मदुनि । विभाग उपिं करदातापिनिगु सेवा बन्द यायेगु तयारी यानाच्वंगु दु । नां सार्वजनिक जूपिन्त लिखित व मौखिक सुचं ब्यूगु अधिकारीं धाःगु दु । सार्वजनिक सुचं जारी याःगु दु । ब्यूगु ई क्वचाइगु इलय् कार्यस्थलय् वनाः माइकिङ याःगु दु । अधिकारीं धाःगु दु, ‘जिमिसं करदाताया सहजताया नितिं ज्या यानाच्वनागु दु । थथे ज्या याःसां नं अटेर याःपिन्त कानूनी कारवाही न्ह्यकेगु बाहेक मेगु विकल्प मदु । जिमिगु इनाप व सुचंया अटेर याःपिनिगु छेँ, पसः व व्यवसायस शिलबन्दी यानाः सरकारी बाँकी सरह राजस्व असुली यायेगुया विकल्प मदु ।’
...
All Comments.......
Please Login/Register To Comments