- Post Date 2021-08-09 11:20:52
कृष्ण प्रजापति
नेकपा एमालेया नायः केपी शर्मा ओलीं छुं नं हालतय् नायः (अध्यक्ष) पद मत्वःतेगु धाःगु दु । लिपांगु ई पार्टी दुने माधवकुमार नेपाल पक्षं एकताया नामय् सर्त हे सर्त थप यानाच्वंगु धासें नायः ओलीं वया नियतय् नं आशंका याःगु दु । आइतवाः सनिलय् ओली निवास बालकोटय् कर्णाली प्रदेशया नेकपा एमालेया झिगुलिं जिल्ला नायःपिं लिसेया मंकाः भेटघाट ज्याझ्वलय् ओलीं धाःगु दु, ‘पार्टी एकता यायेमाः धैगु खँ जिं नं मानेयाये । तर मेगु पक्षं सर्त हे सर्त तयाच्वंगु दु । उकियात हुबहु मानेयानाः जिं अधिवेशनया म्यान्डेट अःखः एकता याये फइमखु । पदीय भागबन्डा जिं मखु, महाधिवेशनं हे क्वचायेकेमाः । आः क्वचायेकूसां नं कन्हय् नं गुटगत गतिविधि मजुइ धायेफइमखु ।’
नेकपा एमाले कालिकोटया नायः नगीन्द्र शाही नेशनलया कथं नायः ओलीं कर्णालीया झिगुलिं जिल्ला नायःतय्गु मंकाः भेटघाटय् मुलुकया समसामयिक राजनीति, संगठन निर्माण, प्रमुख प्रतिपक्षया हैसियतय् म्हितेमाःगु भूमिका, पार्टीया एजेन्डाबारे सहलह याःगु खः । नायः ओलीं थः पार्टीया जिम्मेवार नेता जूगुलिं गुलि लचिलो जुइमाःगु खः, उलि जुयागु, पार्टीया ज्या थातिं तयाः फयांफतले कुतः यानागु तर गुटया नामय् सर्त थप जूबलय् नियत बांलाःगु मखंगु नं धाःगु दु । ओलीं धाःगु दु, ‘पार्टी एकताया नितिं सुं बाबाजीलिसे ग्रह दशा या जातः टिपन स्वकेम्वाः ।’
कालिकोटया नायः शाहीं पार्टी एकताया अन्यौल याकनं समाधान यानाः न्ह्यःने वनेमाःगु सुझाब बियागु जानकारी ब्यूगु दु । वं धाःगु दु, ‘पार्टी धयागु नेतातय्गु मिलन जक मखु, विचाः, सिद्धान्त मुद्दाया मिलन खः । फयांफतले याकनं पार्टीइ ब्वलनाच्वंगु अन्यौल समाधान यानाः न्ह्यःने वनेमाः धकाः सल्लाह बिया । एमाले मिलेजूसा बांलाइगु खः । आः सम्भव मदुसा लिपा मिलेजुइ । अझ लिपा ला माओवादीलिसे नं मिलेजुइगु थाय् दइला । फुक्क बाम, छगू ठाम जुइगु स्थिति नं दइला । तर आः नेकपा एमाले ल्हाःतुति चिनाः गन्तव्यय् थ्यंके फइमखु । थ्व कर्णालीया झिगू जिल्ला जक मजूसे ७७ गू जिल्लाया हे एमालेजनया सः खः ।’
मंकाः भेटघाटय् भूगोलया खँ नं नुगः क्वसायेकाः जूगु नेता शाहीं धाःगु दु । वं धाःगु दु, ‘पार्टी दुनेया मतमतान्तर व अन्तरसंघर्ष रुपान्तरणया नितिं जुइमाः । तर माधव नेपाल विचार समूहया नामय् छम्हेस्यां मेम्हेसित खत्तम यायेगु ज्या जुयाच्वंगु खनेदु । विधान व पद्धतिं मिलेमजूगु खँ ल्हानाः पार्टीयात अनिर्णयया बन्दी यानातयेगु पायछि मखु ।’ सुर्खेतया ध्रुव शाही, दैलेखया रवीन्द्र शर्मा, हुम्लाया दल रावल, सल्यानया गोविन्द पुन, डोल्पाया लंकबहादुर शाही, जाजरकोटया करवीर शाही, मुगुया सोनाम लामा, पश्चिम रुकुमया नन्दऋषि शर्मा, जुम्लाया जयबहादुर रोकाया व कालिकोटया नगीन्द्र शाही नेशनल ओली निवास थ्यंकूगु खः ।
...
All Comments.......
Please Login/Register To Comments