- Post Date 2021-08-11 12:53:49
.jpg)
कृष्ण प्रजापति
नेपाल विद्युत प्राधिकरणया कार्यकारी निर्देशकय् कुलमान घिसिङ नियुक्त जूगु दु । सोमवाः च्वंगु मन्त्रिपरिषद बैठकं कुलमान घिसिङयात प्राधिकरणया कार्यकारी निर्देशकय् नियुक्त याःगु खः । २०७७ भाद्रय् थःगु प्यदँया कार्यकाल पूवंकाः विदा जूम्ह घिसिङयात सरकारं हाकनं प्राधिकरणया कार्यकारी निर्देशक पदय् नियुक्त याःगु खः । सोमवाःया मन्त्रिपरिषद बैठकं घिसिङयात कार्यकारी निर्देशक यायेगु निर्णय याःगु जानकारी ऊर्जा जलस्रोत व सिँचाइ मन्त्रालययात मन्त्रिपरिषदया ज्याकुथिं मंगलवाः याकूगु खः । थ्वलिसें मन्त्रालयं बुधवाः कुलमान घिसिङयात नियुक्ति पौ बिइगु तयारी याःगु दु ।
नेपालय् लोडसेडिङ चिइकेत प्राधिकरणया नेतृत्वय् च्वनाः भूमिका म्हितूम्ह कुलमान घिसिङयात पुनःनियुक्त यायेत तत्कालीन प्रधानमन्त्री केपी शर्मा ओलीं अस्वीकार याःगु खः । ओलीं प्रक्रिया पूवंकेमःगु धायेधुंकाः मन्त्रिपरिषदय् थ्यंगु नियुक्ति प्रस्ताव सहलह जुइमखंगु खः । तर, न्हूगु सरकार गठन जुइधुंकाः प्रधानमन्त्री शेरबहादुर देउवा, नेकपा माओवादी केन्द्रया नायः पुष्पकमल दाहाल प्रचण्ड व ऊर्जा जलस्रोत व सिँचाइ मन्त्री पम्फा भुसालदथुइ सहमति जूगु खः । कुलमान घिसिङया थ्वसिबें न्ह्यःया कार्यकालय् न्ह्याकूगु आपालं आयोजना प्राधिकरणया वर्तमान नेतृत्वं न्ह्यःने यंकेमफूगु व प्राधिकरण हाकनं न्हापाया हे अवस्थाय् लिहाँ वनीगु जोखिम जुइगु ठहर यासें घिसिङयात हाकनं मौका बिइगु सहमति जूगु मन्त्रालय स्रोतं धाःगु दु ।
वंगु साउन १९ गते हे ऊर्जा जलस्रोत व सिँचाइ मन्त्री पम्फा भुसालं प्राधिकरणया वर्तमान कार्यकारी निर्देशक हितेन्द्रदेव शाक्ययात पदं राजीनामा बियाः ग्वाहालि यायेत इनाप याःगु खः । वं शाक्ययात सरकारं उचित जिम्मेवारी बिइगु कथं निर्णय यायेगु धासें शाक्ययात प्राधिकरणपाखें धाःसा विदा जुइत इनाप याःगु खः । वहे कथं घिसिङयात कार्यकारी निर्देशक यायेधुंकाः प्राधिकरणया वर्तमान कार्यकारी निर्देशक शाक्ययात जल व ऊर्जा आयोगय् विशिष्ठ श्रेणीया पद सचिव सरहया पूर्णकालीन दुजः पदय् पदस्थापन यायेगु निर्णय नं याःगु दु । उकिया नितिं आयोगया गठन आदेशय् तकं संशोधन याःगु दु । सरकारं शाक्यं आः प्राधिकरणय् कयाः वयाच्वंगु तलब सुविधा म्हो मजुइगु कथं उगु जिम्मेवारी बिइगु निर्णय याःगु खः । उकिया नितिं अर्थमन्त्रालयं नं सहमति ब्यूगु दु । शाक्यया विज्ञतायात मध्यनजर यासें वयात विदा मयाःसे सरकारया जल व ऊर्जा नीति निर्माणय् शाक्यया अनुभवयात उपयोग यायेगु योजना सरकारं दयेकूगु खः । शाक्यं नं सरकारं थःत ससम्मान बिइगु मेगु जिम्मेवारीइ वनेत तयार जूगु धयाः वयाच्वंगु दु ।
...
All Comments.......
Please Login/Register To Comments