- Post Date 2021-09-06 12:08:41
कृष्ण प्रजापति
थौं चान्हय् मदिक्क वःगु वां यानाः येँया बागमति व विष्णुमति खुसिबाः वःगु दु । खुसिबालं यानाः खुसि सिथय् छेँ दयेकाः च्वनाच्वंपिं सुकुम्बासीतय् यक्व हे छेँ डुबानय् लाःगु दुसा खुसिया लः पिहां वयाः खुसि सिथय् दयेकातःगु लँ नं बन्द जूगु दु । विष्णुमतिइ वःगु खुसिबालं यानाः येँया परोपकार, चागः लागाया लँ हे बन्द जुइगु खुसिया लः लँय् दुहां वःगु खः । परोपकार लागाय् ताँ दयेकेत खुसिइ यक्व निनां तयातःगुलिं यानाः खुसिया लः बांलाक न्ह्याये मफुगुलिं नं खुसिया लः लँय् थहां वःगु खँ स्थानीयतय्सं धाःगु दु । लँय् थहां वःगु खुसिया लः सुना वनेधुंकूगु दुसा लः लिसें वःगु ध्याचलं धाःसा लँ फुक्क हे ध्याचःया ध्याचः यानाबिउगु दु । लः थहां वयाः खुसि सिथय् दयेकातःगु पार्क नं जलमग्न जूगु खः ।
मेखे बागमति खुसि बहाः वयाः त्रिपुरेश्वर थापाथली लागाय् च्वंगु सुकुम्बासी लागा नं डुबानय् लाःगु खः । येँ जिल्लाया प्रहरी प्रमुख एसएसपी अशोक सिंहया कथं थौं चान्हय् वःगु खुसिबालं जक ३८२ खा छेँ डुबानय् लाःगु जानकारी वयेधुंकूगु व १३८ म्हेसिया उद्धार यानागु जानकारी बियादीगु दु । प्रहरीं बिउगु जानकारी कथं थौं चान्हय् वःगु वां यानाः बल्खु, कुलेश्वर, कोटेश्वरया नरेफाँट क्षेत्र, नेपालटार, शंखमुल आदि थासय् छेँ डुबानय् लाःगु खः ।
...
All Comments.......
Please Login/Register To Comments