- Post Date 2021-09-16 12:16:07
कृष्ण प्रजापति
स्वनिगःया आपालं स्कूलय् मोहनी नखः न्ह्यः भौतिक उपस्थितिइ ब्वंकेगु ज्या मजुइगु जूगु दु ।
बुधवाः स्वास्थ्य व जनसंख्या मन्त्रालयस जूगु सरोकारवालाया सहलह ज्याझ्वलय् कोरोना भाइरस महामारीया जोखिम कायम हे जूगुलिं स्कूल चायेकेत हथाय् मचायेगु सहमति जूगु दु । नीजि व आवासीय स्कूल अर्गनाइजेसन प्याब्सनया सहअध्यक्ष डिके ढुंगानां ब्वनामि ल्याः आपालं दूगु स्कूल तत्काल मचायेकेगु सहमति जूगु धाःगु दु । म्हो ब्वनामि दूगु स्कूलं धाःसा च्वय् च्वंगु तगिंया ब्वनामिपिन्त ब्वंकेगु ज्या यायेफइगु ढुंगानाया धापू दु ।
नीजि स्कूल संचालनया मेगु संस्था एनप्याब्सनया नायः ऋतुराज सापकोटां नं म्हो ब्वनामिपिं दूगु स्कूल मापदण्ड छ्यलाः चायेकेगु व आपालं ब्वनामिपिं दूगु स्कूल मचायेकेगु सहमति जूगु धाःगु दु । सापकोटां धाःगु दु, ‘स्वनिगः रेड जोनय् लाःसां नं फुक्क क्षेत्रय् ब्यागलं अवस्था जूगुलिं ब्वनामि ल्याः म्हो दूगु स्कूलय् मापदण्ड छ्यलाः चायेकेगु व आपालं ब्वनामिपिं दूगु स्कूल धाःसा बुलुहुँ चायेकेगु धैगु सहलह जुल । स्वनिगःया छुं छुं स्थानीय तह नं स्कूल संचालन यायेधुंकाः निर्णयस एकरुपताया नितिं स्वास्थ्य व जनसंख्या राज्यमन्त्री उमेश श्रेष्ठं सरोकारवालायात सहलहस सःतूगु खः ।
सहलहस स्वास्थ्य मन्त्रालयया अधिकारी, शिक्षा विज्ञान व प्रविधि मन्त्रालयया छ्याञ्जे, सीसीएमसीया अधिकारी व शिक्षा क्षेत्रलिसे सरोकार तइपिं थीथी व्यक्तिपिं सहभागी जूगु खः । नेपाल अभिभावक महासंघया नायः सुप्रभात भण्डारीं धाःसा मोहनी न्ह्यः स्कूल मचायेकेगु भद्र सहमति जूगु धाःगु दु । वं धाःगु दु, ‘गुलिखे मचात गृह जिल्लाय् दूगु व स्वनिगःया येँ, यल व ख्वपय् मोहनी न्ह्यः स्कूल चायेकेत हथाय् जूगुलिं मोहनी नखः लिपा चायेकेगु भद्र सहमति जूगु दु ।’
स्वनिगःया छुं छुं स्थानीय तहलय् स्कूल चाःसां नं येँ महानगरपालिका व ख्वप नगरपालिकां स्कूल चायेकेगु निर्णय याःगु मदुनि । यल महानगरपालिकां धाःसा स्कूल चायेकेगु निर्णय यायेधुंकूगु दु । स्थानीय तहया निर्णयस एकरुपताया नितिं बिहिवाः बैठक सःतूगु दु । स्वास्थ्य व जनसंख्या मन्त्रालयया प्रवक्ता डा. कृष्ण पौडेलं कोरोना संक्रमणया जोखिम स्वयाः स्थानीय तह नं जिल्ला कोभिड १९ संकट व्यवस्थापन केन्द्रया समन्वयस स्कूल चायेकेगु निर्णय यायेफइगु धाःगु दु । तर मचापिनिगु स्वास्थ्य सुरक्षाया जोखिमबारे विचाः यायेमाःगु वं धाःगु दु । वं धाःगु दु, ‘जोखिम म्हो जूगु मदुनि, देय् न्यंकंया फुक्क पालिकाय् छगू हे अवस्था दु, फुक्क स्कूलय् नं छगू हे अवस्था मदु । फुक्क निकाययात संवेदनशील जुइत इनाप यानाच्वना ।’
...
All Comments.......
Please Login/Register To Comments