- Post Date 2021-09-23 11:22:01
कृष्ण प्रजापति
सिद्धिदास प्रतिष्ठान ख्वपया ग्वसालय् जूगु महाकवि सिद्धिदास महाजुया १५४ क्वःगु बुदिं हने ज्याझ्वलय् सिद्धि लुमन्ति क्वथा न्ह्याकेज्या जुल । ताः ई न्ह्यःनिसें सिद्धिदासया लुमन्तिइ थीथी ज्याझ्वः याना वयाच्वंगु प्रतिष्ठानं थुगुसी न्हापांखुसि महाकविया थीथी पक्षयात दुथ्याकाः थुगु सिद्धि लुमन्ति क्वथा नीस्वंगु खः । कवि योगेन्द्र प्रधान नेडरल्याण्ड झाःगु इलय् अन विश्व प्रसिद्ध साहित्यकार अर्नेष्टो हेग्मेग्वेया लुमन्तिइ थीथी कथं संग्रहालय नीस्वनातःगु खँयात अनुकरण यानाः वय्कःया हे कल्पना कथं थुगु सिद्धि लुमन्ति क्वथा नीस्वंगु खः ।
सिद्धिदास प्रतिष्ठानय् नीस्वंगु थुगु सिद्धि लुमन्ति क्वथाया शुभारम्भ यानादिसें कवि योगेन्द्र प्रधानं मदयावंपिंत लुमंकेगु ज्या दुपिसं यायेमाःगु खँ कुलादिसें यक्वः समकालीन च्वमित स्वयां फरक ढंगं निरन्तर च्वनाच्वंम्ह कवि सिद्धिदास महाजु च्वछाये बहःम्ह नेपालभाषाया च्वमि जूगु कनादिल । रामशेखर लुमन्ति दबूया नायः गोविन्दमान श्रेष्ठं कठीन राणाकालीन इलय् नेपालभाषां च्वयेगु हाथ्यां जाःगु ज्या जूगु कनादिल । महाजु फाउण्डेशनया नायः ओमचरण अमात्यजुं विश्वय् हे उठल पुठल जुयाच्वंगु इलय् चन्द्र शमशेर थेंज्याःम्ह क्रुर शासकया पालय् नेपालभाषां च्वयेज्या महाकवि सिद्धिदास महाजुं यानावंगु सराहनीय जूगु खँ कनादिल । सिद्धिदास प्रतिष्ठानया दुजः कवि त्रिरत्न शाक्यं नं न्ववानादीगु ज्याझ्वलय् बिराट नेपालभाषा साहित्य सम्मेलन गुथिया नाय महेन्द्रगोपाल कर्माचार्यं भिन्तुना न्वचु बियादीगु खः । प्रतिष्ठानया अध्यक्ष नरेन्द्रभक्त हाडाया सभापतित्वय् जूगु ज्याझ्वलय् उज्ज्वल नेवालं लसकुस यानादीगु खःसा ज्याझ्वः गणेश भक्त शिल्पकारं न्ह्याकादीगु खः ।
ज्याझ्वलय् भाषासेवी मथुसुदन अवालपाखें बिराटया छेँ दनेगु प्रयोजनया लागिं उगु हे समारोहय् झिद्धः तका दां आर्थिक ग्वाहालि लःल्हानादीगु खः ।
...
All Comments.......
Please Login/Register To Comments