- Post Date 2021-09-27 03:06:43
कृष्ण प्रजापति
धाइ, साइकल चालक दुर्घटना जूसा छम्ह जक हन्ता जुइ । बस चालकं गल्ती यात धाःसा बसय् च्वंक्वः फुक्कंसिया खतरा जुयाच्वनी । तर देय् चले याइपिं राजनीतिक नेतातय्सं गल्ती यात धाःसा देय् व जनता सकसियां अविगत जूवनेफु । अथे जुयाः राजनीतिइ लगे जुइपिं मनूत उलि हे इमान्दार, कर्तब्यनिष्ठ व निःस्वार्थपूर्वक थःगु जिम्मेवारी पूवंकेगु क्षमता दुम्ह जुइमाः । वास्तबय् झीथाय् प्रजातन्त्र व गणतन्त्र वःसानिसें झन्झन् कमजोर शासकतय्गु ल्हातय् देय् लानाच्वंगु दु । शासन सत्ता धइगु बल्लाम्ह, बुद्धि दुम्ह, निडर व अदम्य शाहस दुम्ह शासकया ल्हातय् लायेमाःगु जुयाच्वन । थौं देय् बरबाद जुयाच्वंगु लिउने स्वार्थी नेतातय्गु ल्हातय् देय् लानाच्वंगुलिं खः । अथे मखुसें निःस्वार्थी नेतातय्गु ल्हातय् देय् लाःगु खःसा जःलाखःला देय् चीन थें झी नं विश्वया नम्बर १ देय् जुइ धुंकल जुइ । म्हिगः २०६२।६३ सालया जनआन्दोलन सफल जुइवं न्यूरोडय् थ्यंकाः ट्याक्सीइ च्वँ धकाः थः कमान्डरं अह्रा याःगु इलय् खापा चायेके मसयाः ट्याक्सीइ चालाच्वंगु झ्यालं दुहां वनेत तुति दुत छ्वाइम्ह मनू थौं ड्ढ करोड वंगु गाडी ज्वनाः राजधानीइ चाःहिलाच्वंगु खनीबलय् भ्रष्टाचार सुनं यात धइगु खँ स्पष्ट जू । उकिं नं देय् बरबादया लँपूइ लाःवंगु खः ।
इमान्दारी पूर्वक देय् व जनताया सेवा यानाः पंचायती ब्यवस्थाया बिरुद्ध स्वीदँ तक संघर्ष याःपिं व देय् व जनताया पक्षय् थीथी विचाः व सिद्धान्तय् आवद्ध जुयाः जेल नेल च्वनावःपिं मनूतय्गु राय, सल्लाह व सुझाबया आः तकं कदर जूगु मदुनि । २०४६ सालया घाइते योद्धात व जेल जीवन भेगे यानाच्वंपिं आपालं युवाशक्ति राजनीतिं पिने लानाच्वंगु दु । न उमित सुनानं सम्मान याःगु दु, न त उमिगु धारणा, समर्पण व अदम्य साहास क्यनाः अब्ले डमडम गोली नापं सामना यानाजूगुया छुं कदर जूगु दु । थः सांसद जुइवं, थः मेयर जुइवं अज्याःपिं नापंनापं जेल च्वनाः, दुःख भोग याना व क्वँय्या वर्गयात राजनीतिक चेतना बियाः शिक्षित यायेत गां गामय् वनेत परिवार त्वताः योगदान याःपिं योद्धातय्त गब्लें राजनीतिक पार्टी व सत्ताय् वंपिसं थाय् बियातःगु खनेमदु । खाली दां दुपिं, ध्यबा कमे यायेफुपिं व तस्करी, भ्रष्टाचारी व घुसखोरीतय्गु शरणय् राजनीतिक नेतात लालायित जुयाच्वंगु दु । थ्व देय् व जनताया लागिं धाःसा तसकं द्यापं खः । थःगु स्वार्थया लागिं देय्यात बरबाद यायेगु ज्या झी नेतातय्सं यानाच्वंगु दु । थःपिनि स्वार्थया लागिं देय्यात ह्वानाह्वाना च्याकाच्वंगु दु ।
थौं नं एमसीसी पास यायेगु कुटील चाल म्हिताच्वंगु दु । इमान्दार राजनीतिक पार्टीतय्सं थुमिसं देय् बरबाद याइन धकाः सः सुक्क हालाच्वंसां उमिगु सःयात वास्ता यानाच्वंगु मदुनि । दुनंदुनं मचायेक चांचां महाकाली सन्धी ब्यापक जनताया बिरोधया बाबजुद पास याःथें यायेत स्वयाच्वंगु दु । थ्व चालां देय् कन्हय् बर्बाद जुइत्यंगु स्पष्ट खनेदु । यदि इलय् झीसं थ्व मामलायात ध्यानय् तयाः स्वये मफुत धाःसा देय् कन्हय् दइ वा मदइ तकं धाये मफइगु स्थिति वयेफु । नेपाः नेपाः जुया च्वनेगु खःसा अज्याःगु गलत प्रबृत्तिया बिरोध यायेमाः । एमसीसी लगायत राष्टघाती सन्धी सम्झौता फुक्कं गणतान्त्रिक सरकारं खारेज यायेगु पलाः ल्ह्वनेमाः । यदि देय् न्हूगु परिवेशय् वनेगु खःसा म्हिगः अन्तर्राष्टिय जगतय् लानाच्वंगु छुंनं कथंया गलत छबियात बांलाक वनेमाःगु दु । गल्तीबस पास जुयाच्वंगु सन् १०५० या सन्धी, सुगौली सन्धी व महाकाली सन्धी नापं आपालं राष्टघाती सन्धी सम्झौतायात पुनराबलोकन यायेमाः ।
सरकारया भरय् जक छुं जुइ धकाः च्वनेगु खःसा झी आपालं लिउने लाइ । थःगु क्षमता योग्यता व बुद्धि विवेकयात थः थःगु थासं प्रयोग यायेमाः । सञ्चार क्षेत्रय् जुयाच्वंगु प्रगतियात दुवालाः म्हिगःया स्वयां तीब ढंगं देय् विकासया लँपुइ झी न्ह्याये फत धाःसा जक लिउने लाःगु झीगु थेंज्याःगु अति गरिब देय् सामान्य स्थितिइ तक थ्यंकेफइ । मखुत धाःसा म्हिगःथें राणा शासकतय्सं छत्रुं लिउने लाकल, पंचायती शासन ब्यवस्थां स्वीदँ लिउने लाका वन । आः गणतन्त्र व संघीयताय् नं लिउने लानाच्वन धाःसा झनझन् देय् रसातलय् वनीगु बाहेक प्रगतिया लँपुइ थ्यनीमखु । सरकारया पक्षपातपूर्ण नीति, बजेटय् असमानता व थः मनूतय्त पालन पोषण यायेगु प्रबृत्तिया कारणं नं थौं योग्य व सक्षम मनूत सत्ता व सरकार दुने जक मखु कि राजनीतिया छुं नं निकायय् न्ह्यःने वये मफयाच्वंगु खः । न नेपाली कांग्रेसं हे इमान्दार नेता कार्यकर्तातय्त थाय् बियाच्वंगु दु । न नेकपा समर्थित राजनीतिक दलतय्सं अज्याःगु ज्या यानाच्वंगु दु ।
श्रमयात सम्मान यायेगु ज्या समाजवादी क्रान्तिइ जुइगु खः । तर थौं थःगु बुँ बाँझो तयाः झीसं विदेशीया मरुभूमिइ हराभर यायेत चःति हायेकेगु ज्याय् वनीपिंत प्रोत्साहन बियाच्वनागु दु । वैदेशिक रोजगारया नामय् वनीपिं आपालं झी म्ह्याय्मस्त विदेश वनाः जीवन बरबाद याना लिहां वयेमाःगु अवस्थाय् झी थ्यनाच्वंगु दु । कालान्तरय् थुकिं झीगु देय्यात गुलि लिउने लाकी धइगु खँ ला छुं दँ न्ह्यःनिसें परिवार बिचलन जुयाच्वंगु, लाश स्वयाः सम्पत्ति भागबन्दाय् बिवाद ब्वलनाच्वंगु व थःपिंत वयेमाःगु दां करपिंत वनाच्वंगु वा भाःत बिदेश वनेवं थन वःगु दां मेथाय् गनं प्वचिके यंकाच्वंगु थेंज्याःगु घटनां नं क्यनाच्वंगु दु । विदेशय् ज्या यानां झी सन्तष्ट जुइ फइमखु । थःगु हिचःति थःगु हे देसय् लगेयाये दुसा गुलि च्वन्ह्याइगु खः । म्हिगः नं परनिर्भर जुयाच्वनेत बाध्य जूगु कारणं झी लिउने लाःगु खःसा आः नं आत्मनिर्भर जुइत मस्वत धाःसा झी लिउने लाइ । उकिया लागिं राजनीतिक नेतृत्वं हे सही पलाः ल्ह्वनेमाःगु खनेदु ।
युवा पुस्तायात सही मार्ग निर्देशन यायेगु ज्या राजनीतिक नेतृत्वं याये फयेकेमाः । उमित देय् व जनताया हीत जुइगु ज्याय् लगे याये फयेकेमाः । थन अथे जुयाच्वंगु मदु । शिक्षा नं गलत बियाः खाली बैदेशिक रोजगारयात प्रोत्साहित यानाच्वंगु दु । अध्ययन यायेगु विषय न्ह्याःगु जूसां राजनीतिक चेतना दक्कलय् महत्वपूर्ण विषय खः । पेशा न्ह्याःगु हे याइम्ह जूसां यदि वयात इमान्दार जुइमाः, राष्टियता प्रति सचेत जुइमाः धइगु बांलाक स्यने मफुत धाःसा वं पेशापाखें भिंगु ज्या याये फइमखु । उकिं राजनीतिइ गलत ब्यक्ति वल धाःसा देय् बरबाद जुइफु ।
...
All Comments.......
Please Login/Register To Comments