- Post Date 2021-10-09 13:15:42
कृष्ण प्रजापति
ख्वीक्वःगु बिराट नेपालभाषा साहित्य सम्मेलन थ्वहे वइगु कौलाथ्व द्धादसिकुन्हु न्हिनय् १२ः१५ बजे अजिमा पार्टी महल बाराही पीठय् जुइगु जूगु दु । थुगुसी ख्वपया म्ह्याय्मचा कवयित्री प्रतिसरा साय्मियात ख्वीक्वःगु बिराट नेपालभाषा साहित्य सम्मेलनया मूपाहां दयेकूगु दु । विशेष पाहांकथं येँ महानगरपालिकाया मेयर विद्यासुन्दर शाक्ययात ल्यःगु दु । येँ महानगरपालिकां थुगुसीनिसें महानगरपालिकाया फुक्कं स्कुलय् अनिवार्य रुपं नेपालभाषाया माध्यमं स्थानीय विषय ब्वंकेगु यानाच्वंगुयात कदर यानाः बिराट सम्मेलनं हनेत्यंगु दु ।
बिराट नेपालभाषा साहित्य सम्मेलन गुथिया नायः महेन्द्रगोपाल कर्माचार्यया सभापतित्वय् न्ह्याइगु बिराटया ख्वीक्वःगु सम्मेलनय् बिराट सुरत्न सिरपा नेपालभाषा केन्द्रीय विभाग यलध्याखाया प्रजित शाक्ययात बीगु जूगु दु । नेपालभाषा विषय कयाः एसइइ परीक्षाय् दक्कलय् अप्वः ल्याः हयाः पास यानादीम्ह जगतसुन्दर ब्वनेकुथिया मय्जु सदीक्षा महर्जनयात नेपालभाषा पदकं छाय्पियेत्यंगु दु । सम्मेलनय् बिराट ज्यासना पुचःया दुजः बाबुकाजी सुवालया चिबाखं मुनाः गांगु सिमा नं विमोचन याइगु ज्याझ्वः दु । ज्याझ्वः नमस्ते टेलिभिजन व न्ेवाः सूचना केन्द्रपाखें प्रत्यक्ष प्रशारण जुइगु बिराटया दांभरी रामगोपाल चौगुठी कनादिल ।
...
All Comments.......
Please Login/Register To Comments