- Post Date 2021-10-20 03:09:01
कृष्ण प्रजापति
ख्वपय् कौलाथ्व द्धादशि व त्रयोदशि निन्हुयंकं तःजिक न्ह्यानाच्वंगु पीछक्वःगु नेपालभाषा साहित्य तःमुँज्या मिनिलियम च्यालेन्ज कर्पोरेशन एमसीसीया ब्यापक बिरोध यासें क्वचाल । थुगुसीया तःमुँज्या सहश्राब्दी चुनौती परियोजना एमसीसीया बिरोधय् जक केन्द्रीत जूगु खः । तःमुँज्याया मूपाहां नेपाल मजदुर किसान पार्टीया अध्यक्ष नारायणमान बिजुक्छेँ रोहितं देय्या हित अःखः वःगु एमसीसी सम्झौता बारे ब्यापक नेपाली जनतायात ध्वाथुइकेमाःगु खँ कनादिसें संसारया थीथी देय्या नक्सा क्यनाः जनतायात हिन्द प्रशान्त रणनीतिबारे सचेत यायेमाःगु कनादिल ।
साहित्य सम्मेलनय् चिचिहाकूगु व नाले बहःगु रचनायात अप्वः थाय् बियेमाःगु खँय् बः बियादिसें मूपाहां रोहितं निबन्ध व समालोचना बिधाय् नं प्राथमिकता बियेमाःगु कनादिल । अध्यक्ष रोहितं विचारया युद्धयात नेमकिपां सदां निरन्तरता बियाच्वनीगु खँ नं कनादिल । सांसद प्रेम सुवालं एमसीसी विरुद्ध नेमकिपां आः तकं देय्या न्यय्निगू थासय् बिरोध प्रदर्शन यायेधुंकूगु कनादिसें एमसीसी विरुद्ध देशभक्त व साम्राज्यवादबिरोधी जनता छप्पँ जुयाः वनेमाःगु खँय् बः बियादिल । तःमुँज्याया लिपांगु दिं म्हिगः नेमकिपा येँ जिल्ला समितिया अध्यक्ष नारायण महर्जन, वरिष्ठ पत्रकार भैरव रिसाल, साहित्यकार डा. रामप्रसाद ज्ञवाली, इन्जिनियर राजदास श्रेष्ठ, साहित्यकार नरेन्द्र प्रसाईं, कबयित्री इन्दिरा प्रसाई, सीमा अध्येता रतन भण्डारी, शिक्षाबिद् सर्वज्ञरत्न मल्ल, समाजसेवी कृष्णलाल प्रधान, लुम्बिनी विश्व विद्यालयया उपकुलपति प्रा. डा. हृदयरत्न बज्राचार्य व भक्तपुर क्यान्सर अस्पतालया सर्जक डा. ऋषिकेशनारायण श्रेष्ठपिसं थः थःगु विषयया विज्ञ धारणा न्ह्यब्वयादीगु खः ।
ज्याझ्वलय् जनकवि चन्द्रबहादुर उलक, कान्छा बासुकला, दामोदर सुवाल, विष्णुगोपाल कुसी, शम्भुराम प्रजापति, ओम धौभडेल, सूर्यप्रसाद लाकोल, नारायणकुमार आचार्य, रामप्रसाद किसी, धर्मराज कर्णिकार, युसुप दुवाल लगायत न्हूपिं पुलांपिं साहित्यकारतय्सं रचना वाचन यानादीगु खः । पाठ जूगु रचनाया मूल्यांकनय् चिनाखं विधााय् विकल प्रजापति न्हाप, सकुन्तला महर्जन ल्यू, काशीराम बिरस लियाल्यूं व अर्चना छुकां हःपाः लाःगु खः । अथेहे बाखं विधाय् श्रीया पहिजू न्हाप, एलके सुन्दर ल्यू, श्रीभक्त जोशी (सँक्व) लिया ल्यू व कृष्णप्रसाद सुवाल हःपाः लाःगु खः । वय्कःपिंत नेमकिपाया अध्यक्ष नारायणमान बिजुक्छेँ रोहितं सिरपा लःल्हानादिल । ज्याझ्वः शिक्षिका सुशिला कर्माचार्यया सभापतित्वय् जूगु खः ।
...
All Comments.......
Please Login/Register To Comments