- Post Date 2021-11-16 12:20:20
कृष्ण प्रजापति
नेत्रविक्रम चन्द विप्लव नेतृत्वया नेकपाया कार्यकर्तापिन्सं यलय् छगः साझा बस तोडफोड याःगु दु । यलया इटी चोकय् पेट्रोलपम्प लिक्क बा५ख ८७५५ ल्याःया साझा बसया ल्यूनेपाखेया भागय् विप्लवया कार्यकर्तापिन्सं तोडफोड याःगु खः । बन्द याकेत वःपिं सुं सुं बन्दकर्तापिन्त प्रहरीं गिरफ्तार याःगु दु । येँपाखें २१ म्ह व यलपाखें छम्ह बन्दकर्तापिन्त गिरफ्तार याःगु महानगरीय प्रहरी ज्याकुथि लानिपुखूया एसपी सुशीलसिंह राठोरं जानकारी ब्यूगु दु ।
पेट्रोलियम पदार्थय् जूगु मूल्यबृद्धि लितकायेत माग यासें नेत्रविक्रम चन्द विप्लव नेतृत्वया नेकपां याःगु बन्दया हुनिं देय् न्यंकंया स्कूलय् लिच्वः लाःगु दु ।
बन्दया हुनिं स्वनिगःलिसें मू मू शहरी क्षेत्र पोखरा, धरान, विराटनगर लिसेंया आपालं नीजि व सामुदायिक स्कूलय् थौं मंगलवाः ब्वनेगु व ब्वंकेगु ज्या जुइमफुत । नीजि स्कूल संचालकपिन्सं जोखिमय् च्वने मफइगुलिं आपालं स्कूल बन्द यानागु धाःगु दु । नीजि व आवासीय स्कूल एसोसिएसन नेपाल (प्याब्सन)या नायः टिका पुरीं बन्दया आह्वान जुइधुंकाः शान्ति सुरक्षाया प्रत्याभूति मदुगुलिं आपालं स्कूल बन्द जूगु धाःगु दु । वं धाःगु दु, ‘विद्यार्थीपिनिगु ज्यानया, स्कूलया, सवारीसाधनया सुरक्षाया खँ वइ । शान्ति सुरक्षाया प्रत्याभूति मदु । जिमिगु स्कूलत ग्यात । छन्हुया खँ खः, उकिं जबरजस्ती मयाये धकाः मचायेका ।’
बन्द हडतालया पक्षय् मदुसां नं वाध्यात्मक परिस्थितिं यानाः स्कूल चायेकेमफूगु वया धापू दु । राष्ट्रिय नीजि व आवासीय विद्यालय एसोसिएसन नेपाल (एन प्याब्सन)या नाय ऋतुराज सापकोटा निर्वाध रुपं स्कूल संचालन यायेगु नितिं मन्त्रालयं पहल मयायेधुंकाः स्कूल बन्द जूगु धाःगु दु । वं धाःगु दु, ‘तरकारी, लः, एम्बुलेन्स, दमकल थेंजाःगु गाडीयात खुल्ला याःगु धाःगु इलय् स्कूलया गाडीयात नं चायेकेमाः । व कथंया पहल शिक्षा मन्त्रालयं यायेमाःगु खः, मयात । जिमिसं जोखिम कुबियाः हिम्मत यायेमफुत ।’
ताःई लिपा भौतिक रुपं स्कूल संचालन जुयावःगु इलय् बन्दं विद्यार्थीपिं प्रभावित जूगु दु । सामुदायिक स्कूलत चाःसां नं विद्यार्थी मवयेधुंकाः ब्वनेगु व ब्वंकेगु ज्या जुइमफूगु त्रिपुरेश्वरय् च्वंगु विश्व निकेतन माध्यमिक विद्यालयया हेरम्बरराज कँडेलं धाःगु दु । वं धाःगु दु, ‘जिपिं स्कूल वया । तर विद्यार्थी हे मवल । १०, ११ म्ह विद्यार्थीपिं जक वःगु दु । उकिं जिमिसं थौं ब्वनेगु व ब्वंकेगु ज्या यायेमफुत ।’ सुथंनिसें हे यातायात, बजार, व्यवसाय बन्द जूगु हुनिं नं विद्यार्थीीपं स्कूल खुलेमजुइगु भ्रमय् लाःगु जुइफूगु कँडेलं धाःगु दु । अथेहे, किपूया थीथी स्कूलया शिक्षकपिन्सं थौं स्कूल बिदा मखुसे बन्द जूगु धाःगु दु । स्कूल चायेकेगु आज्जु दुसां नं वाध्य जुयाः स्कूल बन्द यायेमाःगु जानकारी ब्यूगु दु ।
...
All Comments.......
Please Login/Register To Comments