- Post Date 2021-11-24 12:02:26
कृष्ण प्रजापति
येँ देय्या नांजाःगु मरुसतः (काष्ठमण्डप) या पुनर्निर्माण क्वचाःगु दु । मरुसतः पुनर्निर्माण जुयाः आः सामान्य पेटी दयेकेगु ज्या छगू जक ल्यं दनि । फयांफछि थ्वहे मंसिर महिनाय् थुकिया उलेज्या यायेगु तयारी जुयाच्वंगु खँ सीदुगु दु । मरुसतः पुनर्निर्माण यायेत गठन जूगु काष्ठमण्डप पुनर्निर्माण समितिया थौं च्वनीगु बैठकं मरुसतः उलेज्याया मिति समेत क्वःछीफुगु खँ धाःगु दु ।
मरुसतःया पुनर्निर्माण सम्पन्न जुयाः आः पेटी व सिँयागु छुं भचा ज्या जक याये ल्यं दनि । थ्व ज्या छन्हु निन्हुं क्वचाइ । वयां लिपा पुनर्निर्माण समितिपाखें सम्बन्धित निकाययात हस्तान्तरण यानाः उलेज्याया तयारी याइ । काष्ठमण्डप पुनर्निर्माण समितिया नायः लिसें उगु क्षेत्रपाखें निर्वाचित बागमति प्रदेशया सांसदं राजेश शाक्यं कनादीकथं मरुसतः दयेकेगु लागिं मुक्कं ११ करोड ५० लाख तका दां खर्च जूगु दु । थ्व फुक्कं दां येँ महानगरपालिकां उपलब्ध याकूगु खः । येँ मनपां थीथी चरणय् समितियात थ्व दां लःल्हाःगु खः । आः ल्यं दुगु ज्या यायेत मेगु ध्यबा आवश्यक मजूगु खँ वय्कलं कनादिल । वि.सं. २०७२ सालया तःभुखाचय् लानाः सरुसतः पाःताः जुइक दुंगु खः । वयां लिपा पुरातत्व विभागं मरुसतः दयेकेगु लागिं याःगु लगत इष्टिमेट कथं थुकी १९ करोड ८० लाख तका खर्च जुइगु ल्याःचाः पिहां वःगु खः । अबलय् विभागं याःगु अनुमान स्वयां ७ करोड ५० लाख तका कम ध्यबां मरुसतः पुनर्निर्माण जूगु दु । समुदायपाखें ज्या यायेबलय् थथे लागत कम जुइगु खँ समितिया नायः शाक्यं कनादिल ।
मरुसतः दयेकेगु लागिं वि.सं. २०७५ वैशाख १८ गते पुनर्निर्माण समिति नीस्वंगु खःसा वयां लिपा कार्तिक २२ गते न्हूदँया लसताय् लाकाः मरुसतः पुनर्निर्माणया ज्या शुरु याःगु खः । येँ देय्या ऐतिहासिक सम्पदा कथं नांजाःगु मरुसतः थनिं १२०० दँ न्ह्यः दयेकूगु अनुमान याःगु दु । तर आः पुननिर्माण जूगु मरुसतः म्होतिं नं २००० दँ तक छुं मजुइगु दावी समितिया सचिव गौतम डंगोलं यानादिल । तर उकिया लागिं इलय् ब्यलय् मर्मत सम्भार धाःसा जुयाच्वने माःगु खँ धाःगु दु । आः मरुसतः पुनर्निर्माण लिपा गबलय् गबलय् गय् यानाः मर्मत सम्भार यायेगु धइगु खँ मिति व विधि समेत च्वयाः सम्बन्धित निकाययात हस्तान्तरण यायेगु खँ नं धाःगु दु । पुनर्निर्माण समितिया मुँज्या थौं मरु सतलय् हे च्वनेत्यंगु दु । मरुसतलय् हे च्वनेत्यंगु थ्व न्हापांगु मुँज्या खः । थुकिं उलेज्याया मिति बारे सहलह याइगु खा धाःगु दु ।
...
All Comments.......
Please Login/Register To Comments