न्हूगु पुस्ताय् वःगु क्रान्तिया जिम्मेवारी
- Post Date 2021-12-22 04:47:22
कृष्ण प्रजापति
२००७ सालं न्हापांखुसि नेपालय् क्रान्ति जुल धाइ । अथेहे १९९७ सालं पुस्तकालय काण्ड जूगु व प्यम्ह नेपाली सपुतं आत्मबलिदान याःगु घटनायात नं नेपाली क्रान्तिया सुत्रपात कथं कयातःगु दु । थ्वहे झ्वलय् प्रजा परिषदं राणा बिरोधी आन्दोलनया नेतृत्व याःगु व वयां लिपा २००४ सालं नीस्वंगु नेपाली कांग्रेस व नेपाली राष्टिय कांग्रेस अले २००६ सालं नीस्वंगु नेपाल कम्युनिष्ट पार्टीं न्ह्याकूगु आन्दोलन व क्रान्तिया उभारं २००७ साल लिपा राणा शासन पतन जुल । अब्ले क्रान्तिया नेतृत्व याःगु प्रजा परिषदं खःसां नेपाली कांग्रेसया संस्थापत नेता बीपी कोइराला व गणेशमान सिंह अले नेपाल कम्युनिष्ट पार्टीया संस्थापक महासचिव पुष्पलाल श्रेष्ठपिसं न्ह्याकूगु आन्दोलन व क्रान्तिया समर्थनं देसय् तःधंगु उभार वःगु खः । २००७ साल लिपा झिदँ तक पालंपाः शासन ब्यवस्था चले जुल । अब्ले नं युवा पुस्ताया जोश जागर धाःसा भचा हे म्हो मजू ।
थौं २०४६ साल लिपाया जनआन्दोलनं प्राप्त अधिकार व २०६२।६३ सालया संयुक्त जनआन्दोलनं प्राप्त उपलब्धीयात संस्थागत यायेगु झ्वलय् संविधानसभां तयार याःगु संविधानयात सही रुपं कार्यान्वयन यायेगु लागिं व देसय् प्रतिगमनकारी शासकतय्गु हिम्मत नाश यानाः प्रगतिशील भावना कायम यायेगु लागिं नं न्हूगु पुस्तां महत्वपूर्ण भूमिका म्हितूगु खनेदु । देसय् २०४६ सालं ख्वपय् प्यम्ह ल्याय्म्हतय्सं फागुन ८ गते सहादत प्राप्त याये धुंक किपू, येँ, यल लगायत स्वनिगः व स्वनिगलं पिने नं आपालं थासय् न्हू पुस्तां बलिदान यानाक्यन । अथेहे २०६२।६३ या आन्दोलनय् नं योगदान व बलिदान बियेगु ज्याय् जक युवा पुस्ता न्ह्यजिउगु खनेदु । आः वयाः अब्ले युवा जोश जागर व सडक आन्दोलनया नेतृत्व यानाच्वंगु शक्ति गगन थापा थेंज्याःम्ह नेपाल विद्यार्थी संघया नेता नेपाली कांग्रेसया महामन्त्री थेंज्याःगु सभापति लिपाया दक्कलय् महत्वपूर्ण पदय् निर्वाचित जुयावःगु दु । न्हूगु पुस्ता धइगु विचार व भावनां नं न्हूगु जुइमाः । उमेर जक न्हू जुयाः अपरिपक्व जुल धाःसा उकिं न्हूगु पुस्ता धाये जिइमखु । पुलांगु शक्ति, पुलांगु भावना व पुलांगु राजनीतिक ब्यवस्थायात निरन्तरता बियेगु लागिं कमल थापाया थासय् राजेन्द्र सिंग्डेल थेंज्याःम्ह मनू राप्रपाय् निर्वाचित जुया वःगुयात न्हूगु पुस्ताय् जिम्मेवारी वःगु धाये जिइमखु । अथेहे उमेर मदयेकं छक्वः तकं केन्द्रीय सदस्य मजूनिम्ह मनूयात पार्टीया महाधिवेशनं छक्वलं हे सचिव पदय् थनेत स्वयेगु व वयात सचिव पद मबिल धकाः असन्तोष याःगु घटनायात नं न्हूगु पुस्ताया ल्हातय् जिम्मेवारी वःगु धाये मछिं । बरु परिपक्वः जुयाः पार्टीया थीथी निकाय च्वनाः जिम्मेवारपूर्वक ज्या यानालिं सचिव पद वःम्ह योगेश भट्टराई थेंज्याःम्ह मनूयात न्हूगु पुस्ता कथं तयार जुया वःगु खः धायेछिं । नापं मेमेगु पार्टीइ नं उमेरं मखु कि विचार व भावनां परिवर्तनशील जुयाः देय् व जनताया सेवा यायेगु जक उद्देश्य ज्वनाः क्रान्तिकारी भावनायात परिचालन यायेत सक्षम पुस्तायात न्हूगु पुस्ता धायेमाः । उमेरं सुं बुरा जुइमखु । अझ राजनीतिइ ला थ्व लागू हे जुइमखु धाःसां छुं पाइमखु । आपालं देसय् चय्दँ दुपिं नेतातय्सं पार्टी व देय्या नेतृत्व याःगु इतिहास दु । क्यूवाया राष्टपति फिडेल क्यास्त्रो, उत्तर कोरियाया राष्टपति किम इल सुंग अज्याःपिं हे नेतात खः ।
नेपालय् नं ८२ दँ तक इतिहास दयेक गणेशमान सिंहं पार्टीया सबल नेतृत्व यानाच्वन । अथेहे गणेशमान बिजुक्छेँया काय् नारायणमान बिजुक्छेँ रोहितं थौं तक नं ८२ दँ बैस थ्यन नं पार्टी अध्यक्ष जुयाः ज्या यानाच्वंगु दु । २०३१ सालं नीस्वंगु उगु पार्टी आः माघ १० गते थःपिनि पीन्यादँ बुदिं हनेत्यंगु दु । थथे राजनीतिक नेतृत्व न्हूगु पुस्तायात वःगु वा न्हूगु पुस्तां क्रान्ति व देय्या नेतृत्व याइगु इतिहास विदेय् थें नेपालय् नं जारी जूगु दु । थ्व झ्वलय् आः नकतिनि जक राप्रपा, नेपाली कांग्रेस, नेपाल कम्युनिष्ट पार्टी एमाले लगायत थीथी पार्टीं यानाच्वंगु पार्टीया नेतृत्व परिवर्तनय् न्हूगु पुस्तायात वःगु जिम्मेवारीया कारणं थप आशा याये बहः जुयाच्वंगु दु । आः हाकनं नेपाल कम्युनिष्ट पार्टी माओवादीं नं थःपिनि महाधिवेशन यानाः न्हूगु पुस्तायात पार्टीया नेतृत्व हस्तान्तरण यायेत स्वयाच्वंगु दु धायेबलय् देसय् थ्व इलय् न्हूगु पुस्तायात क्रान्ति व देय्या नेतृत्व यायेगु भाला वःगु दु ।
रुसय् लेनिन लिपा स्टालिनं सवल रुपं क्रान्तिया नेतृत्व याःगु खः । तर वयां लिपा बिस्तारं खुश्चेभ व मिखाइल गोर्भाचोभ थेंज्याःपिं संशोधनवादी तत्व हाबी जुया वयेवं क्रान्ति पतन जूवन । अथे मजुइकेत न्हूगु पुस्ताय् सत्ता हस्तान्तरण यायेगु इलय् व पार्टीया नेतृत्व हस्तान्तरण यायेगु इलय् नं गुलि इस्पात थें बल्लाम्ह, शत्रुनापं सामना यायेफुम्ह खः वा क्रान्ति व प्रगतियात थपू यायेफुम्ह खः कि मखु धइगु बांलाक ध्वाथुइकेमाः । मखुत धाःसा न्हूगु पुस्ताया नामय् गलत मनूतय्गु ल्हातय् पार्टी लायेफु । बरु छम्ह बस चालक खराब जुल धाःसा छुं मनूतय्गु ज्यान जक धरापय् लाइ । तर देय् व जनताया नेतृत्व याये धकाः पार्टीया जिम्मेवारी पदय् थ्यंकीपिसं म्हिगः थें याना देय् व जनतायात धोका बिल धाःसा देय् हे पतन जूवनेफु । उकिं नं म्हिगः राणा कालय् थें क्रान्ति सफल जुल नं पंचायती शासन ब्यवस्था लागु याना स्वीदँ थप जुजुं शासन यात । अब्लेया जुजुपिं व आःया जुजु थें हे श्रीपेच मदुसां जुजु महाराजया स्वभाव दुपिं राजनेतातय्गु नेतृत्वय् देय् चले जुयाच्वनेगु स्वयां न्हूगु पुस्तां न्हूगु भावना व देय् विकासया मूलमन्त्र थःगु कार्ययोजना कथं दयेका ज्या याइपिं जुल धाःसा म्हिगः थें सोभियत संघ पतनया वातावरण तयार जुइमखु । नेपालय् वःगु बारम्बारया क्रान्ति व परिवर्तनयात आत्मसात यानाः ज्या यायेगु वातावरण न्हूगु पुस्तायाके दइ ।
थथे स्वयेगु खःसा थौं न्हूगु पुस्तायाके देय् व जनताया नेतृत्व यायेगु ह्वःता चूलावःगु दु धायेमाः । मखुत धाःसा सुशिल कोइराला थेंज्याःपिं निरिह व शारिरीक रुपं नं अशक्त मनूत पार्टी सभापति व प्रधानमन्त्री जुइगु मौका हाकनं हाकनं वइ । शेरबहादुर देउवा थेंज्याःपिं ७० दँ दये धुंक नं थःपिनिगु बल बुट्टापाखें सभापति त्याका वःपिं मनूत थीथी पार्टीइ हावी जुइ । उकिं नं न्हूगु पुस्ता व न्हूगु पुस्तां याइगु क्रान्ति व परिवर्तनया नेतृत्वयात बांलाक ध्वाथुइकेमाःगु थौंया आवश्यकता खनेदु ।<!--[if gte mso 9]><xml>
</xml><![endif]--><!--[if gte mso 9]><xml>
Normal
0
false
false
false
EN-US
X-NONE
X-NONE
</xml><![endif]--><!--[if gte mso 9]><xml>
</xml><![endif]--><!--[if gte mso 10]>
<style>
/* Style Definitions */
table.MsoNormalTable
{mso-style-name:"Table Normal";
mso-tstyle-rowband-size:0;
mso-tstyle-colband-size:0;
mso-style-noshow:yes;
mso-style-priority:99;
mso-style-qformat:yes;
mso-style-parent:"";
mso-padding-alt:0in 5.4pt 0in 5.4pt;
mso-para-margin-top:0in;
mso-para-margin-right:0in;
mso-para-margin-bottom:10.0pt;
mso-para-margin-left:0in;
line-height:115%;
mso-pagination:widow-orphan;
font-size:11.0pt;
font-family:"Calibri","sans-serif";
mso-ascii-font-family:Calibri;
mso-ascii-theme-font:minor-latin;
mso-hansi-font-family:Calibri;
mso-hansi-theme-font:minor-latin;
mso-bidi-font-family:"Times New Roman";
mso-bidi-theme-font:minor-bidi;}
</style>
<![endif]-->
...
All Comments.......
Please Login/Register To Comments