- Post Date 2022-01-04 12:24:36
स्वास्थ्य व जनसंख्या मन्त्रालयं कोरोना भाइरसया न्हूगु भेरियन्ट ओमिक्रोनया संक्रमण रोकथाम व नियन्त्रणया नितिं माःगु पलाः न्ह्याकेत मातहतया निकाय व स्थानीय तहयात निर्देशन बिइधुंकूगु दु ।
जनस्वास्थ्यविद्तय्सं नं माघया निगूगु वाःनिसें कोरोनाया स्वंगूगु लहर वयेफूगु आँकलन यानाच्वंगु दु । यदि स्वंगूगु लहर वःसा थुकिया न्हापांगु लिच्वः मचापिन्त लाइगु अनुमान याःगु दु । थ्वहे झ्वलय् थुगु विषयस सरुवा ल्वय् विशेषज्ञ डा. शेरबहादुर पुनं छु धयादी ? ओमिक्रोन थःथवं डेल्टासिबें तगडा ला मखु । तर न्हापांगु लहरय् सिबें निक्वःगु लहरय् अप्वः मचापिन्त लिच्वः लाकल । ‘मल्टिसिष्टम इन्फ्लेमेटोरी सिन्ड्रोम’या हुनिं अस्पताल भर्ना जुइपिं मचात अप्वः जुल । खोप काःपिन्त समस्या म्हो जूगु खनेदूगु दु । सुनां खोप काःगु मदु, वयात जोखिम दु धैगु क्यंगु दु । आः जिमिसं धायेफूगु धयागु मेमेगु देशया अवस्थायात स्वयाः खः । उज्वःगु अध्ययन रिपोर्टत हे ला वःगु मदुनि, अयसां नं बुखँय् जानकारी ब्यूकथं न्हापांगु भेरियन्टं सिबें ओमिक्रोनं अप्वः मचापिं अस्पताल भर्ना जूगु दु ।
दक्षिण अफ्रिकी देशय् न्हापांगु भेरियन्टं सिबें ओमिक्रोन संक्रमणया हुनिं मचात अस्पताल भर्ना जूगु बुखँ वयाच्वंगु दु । अथेहे, अमेरिकाया न्यूयोर्कय् नं न्हापांगु भेरियन्टया तुलनाय् ओमिक्रोनं संक्रमित मचात अस्पताल भर्ना जुयाच्वंगु खनेदूगु दु । उकिं थ्व भच्चा जोखिमपूर्ण दु धकाः यायेफु । न्हापांनिसें हे स्वंगूगु लहरय् मचापिन्त अप्वः लिच्वः लाइगु धैगु अनुमान यानाः वयाच्वंगु खः । उकिया आधार धयागु हे मचातय्गु नितिं खोप तयार मजूगु खः । दक्षिण अफ्रिकी देशत व अमेरिकाया न्युयोर्कय् मचात अस्पतालय् दूगु बुखँपाखें थुकियात आपालं हदतक पुष्टि याः । थुकियात आधार मानेयानाः नेपालय् नं जोखिम दु धैगु जिं आँकलन यानागु खः ।
न्हापांगु सावधानी धयागु खोप कायेगु हे खः । आः वयाच्वंगु बुखँया आधारय् नं थुगु इलय् झीसं मचापिन्त बियाच्वनागु खोपयात तीव्रता बिइमाः । छुं नं हुनिं खोप बिइगु ज्या दिकेमज्यू । थ्व खोप कायेगु अतिकं पायछि व ‘गोल्डेन टाइम’ खः धाये जिं । छाय् धाःसा आः ओमिक्रोन ब्यापक मजूनिगु व स्कूलत चालाच्वंगु अवस्था दु । मचात स्कूल वनाच्वंगु दु । थ्व इलय् खोप बिइफत धाःसा ओमिक्रोनपाखें वइगु थप समस्या आपालं म्हो जुइगु खनेदु । ब्वलंकेगु सिबें न्ह्यः खोप कायेखनीगु अवस्था् आपालं बांलाः जुइ । मचापिन्त खोप बिइ क्वमचायेकं ओमिक्रोनं थःगु उपस्थिति क्यनेगु यात धाःसा जटिल समस्या वयेफु । मेगु खँ स्कूलय् मचापिं हुलमुल मुनेगु याइ । हुलमुल मुनीबलय् झीसं धयाः वयाच्वनागु स्वास्थ्य सुरक्षाया मापदण्ड छ्यलेगु, स्कूलया शिक्षक, कर्मचारी फुक्क सचेत जुइगु जरुरी दु । अथेहे, विद्यार्थीया अतिरिक्त क्रियाकलापयात व्यवस्थापन यायेमाः ।
...
All Comments.......
Please Login/Register To Comments