- Post Date 2022-01-17 01:38:14
कृष्ण प्रजापति
धाइ, नीतितय्गु नं नीति वा जुजु नीति धइगु देय्या राजनीति खः । राजनीति स्वच्छ जुल धाःसा देय् बांलाइ । विदेशी नीति व कुटनीति सबल जुल धाःसा सुं नं बिदेशी फौज वा सत्रुया न्ह्यःने ग्याये मालिमखु । थुकथं कुटनीति व देय्या राजनीति धइगु देय्यात याकनं याकनं च्वन्ह्याकेगु छगू बांलाःगु लिधंसा खः । तर थौं झीगु देसय् राजनीति व कुटनीति लोभी, पापी व खराब ब्यक्तितय् ल्हातय् लानाच्वंगु दु । ब्यक्तिगत सम्पत्तियात प्रश्रय बीपिं राजनीतिज्ञ नापं कुटनीतिज्ञतय् कारणं देय् लिउने लाइगु सम्भावना खने दयाच्वंगु दु । छाय् धाःसा थन आः नं विदेशीतय् ध्यबा नयाः एमसीसी पास यायेगु ल्याखं लकडाउन, स्मार्ट लकडाउन नापं भेला, बैठक, जुलुस प्रदर्शन व सभा समारोह याये मदइगु यानाः प्रतिवन्धात्मक नियम पारित यायेत स्वयाच्वंगु दु । गुलिं थासय् ला लकडाउन सुरु जुइधुंकूगु खँ प्रमुख जिल्ला अधिकारीं मौखिक जानकारी बिइधुंकूगु दु । आः तकतिनि जक यलया प्रमुख जिल्ला अधिकारीं यलय् लकडाउन सुरु जुइधुंकूगु खँ सार्वजनिक यानादीगु दु । यल नगर नेपाली कांग्रेसया ल्हातय् लानाच्वंगु महानगरपालिका जूगुलिं अन छुं नं कथं ज्या खँ यायेत केन्द्रीय सरकारयात अःपुयाच्वंगु कारणं जुया नं खइ उकथंण भावार्थ पिज्वइ कथं प्रमुख जिल्ला अधिकारीं सार्वजनिक समारोहय् थःगु अभिब्यक्ति सार्वजनिक यानादिल ।
अप्वः धइथें उद्योमी, ब्यापारी व कर्मचारी वर्ग धाइपिं सम्पत्तिया लोभी हे जुयाच्वनी । थ्व स्वाभाविक चीज नं खः । थःगु लगानी उठे यायेत, निगः ध्यबा कमे यायेत वा थःगु श्रम अनुसारया दां कमे यानाः थःगु भविष्ययात सुनिश्चित यायेत जक उमिसं मेहनत यानाच्वनीगु खः । तर राजनीतिज्ञ नापं कुटनीतिज्ञ धाइपिं त्यागी, तपश्वी व आदर्श जीवन हनीपिं जुइमाःगु खः । जब ब्यापारी, उद्योगी वा कर्मचारीतन्त्रयात राजनीतिइ दुत हयेगु काइदा स्वइ, अब्ले ब्यक्तिगत सम्पत्ति अप्वयेकेगु लोभं उमिसं जिउगुं मजिउगुं वा भिंगुं मभिंगुं ज्या यायेत स्वइगु नं अस्वाभाविक मखु । उकिं नं संस्कार हे मदुपिं मनूतय्त राजनीतिक संस्कार बियेत स्वयेगु नं पाय्छि मजू । झीथाय् आः नं भचा तःमि जुइवं, ब्यापारय् सफल जुइवं राजनीतिइ दुत हयेत स्वइ, अले वं राजनीतियात हे ब्यापार यायेगु लागा दयेका बी । राजनीति स्वनी । कुटनीति व राजनीति धइगु देय्या भविष्यनापं सम्वन्धीत जुयाच्वनी । गब्ले ब्यक्तिगत सम्पत्तिया लोभीत उद्योगी ब्यापारीतय्त राजनीतिक, कुटनीतिक व सामाजिक जिम्मेवारी बिइ, उमिसं थःपिनि स्वभाव क्यना हे त्वती ।
नेपाल व भारतया दथुइ कुटनीतिक झन्झट वःगुया दथुइ नं थ्वहे छगू बांलाःगु उदाहरण खः । आः तकं मेमेगु सन्धी सम्झौता स्वयां सन् १९५० या नेपाल भारत दथुइ जूगु सन्धीयात नेपाली सदां असमान वा नेपाल किजा थें व भारत तःधिकम्ह दाजु थें याना सन्धी जूगु तायेकी । उगु ईया खँ ल्हायेगु खःसा ब्यापारीक ल्याखं थ्व सन्धी जूगु कारणं हे असमान जूवंगु खः । जब नेपालय् २००७ सालया क्रान्ति जुल । वयां लिपा फुक्कं राणातय् सम्पत्ति सुरक्षित यायेत भारतय् तये यंकूगु ई खः । उगु इलय् प्रजातान्त्रिक सरकारया न्हापांम्ह प्रधानमन्त्री नं मोहनशमशेर जबरा जुयाबिल । भारतं नेपाःयात २००७ श्रावण १६ गते सन् १९५० जुलाई ३१ तारेखय् नेपाल भारत मैत्री सन्धीइ हस्ताक्षर याकल । थुकियात आः तक सन् १९५० यागु सन्धी धायेगु याइगु खः । अब्ले सकलें राणा शासकतय्गु सम्पत्ति भारतय् थ्यने धुंकूगु ई खः ।
थःपिनि आर्थिक श्रोत वा सम्पत्ति फुक्कं भारतय् लाये धुंकूगु ई जूगु कारणं मोहन शमशेरया पालाय् जूगु उगु सन्धीइ नेपाल पक्षं सही यायेमखु धकाः अस्वीकार यायेगु सहास अब्ले याये मफुत । आः नं भारतीय पक्षपाखें अमेरिकी सहयोग प्रदान याइकथं एमसीसी सम्झौता सदनय् थ्यनाच्वंगु दु । थ्व इलय् नं नेपाःया आपालं सत्ताशीन नेतातय् सम्पत्ति नेपालय् स्वयां अप्वः भारतय् दु । करोडौं डलर उखे सम्पत्ति सुचुकातःपिं नेतातय् कारणं नेपाल थौं हाकनं नेपाः जुया च्वने फइगु खः कि मखु धइगु शंका ब्वलंगु दु । थ्व धइगु झीगु देय्या राजनीतिज्ञ व कुटनीतिज्ञतय्गु स्वार्थी भावना म्वाः मदुगु इलय् जागे जुइगुलिं खः । जब राष्टयात संकट जुइ, कुटनीतिक मर्यादाय् च्वनाः उगु समस्याया समाधान यायेमाली । अज्याःगु इलय् जक सही दृष्टिकोण तयाः कुटनीतिज्ञतय्सं ज्या यायेमाःगु खः । नेपालय् आः तकं भारतीय शासकतय्गु आशिर्वादं जक नेपाःया सत्ताय् प्रधानमन्त्री व मन्त्री जुयेगु परिपातिया विकास जुयाच्वंगु कारणं झीथाय् राष्टिय भावना दुपिं नेतातय् म्हो जुयाच्वंगु खः । थ्व उलि याकनं चिला वनीगु खँ नं मखुत ।
थौं नं देय् दुने जलश्रोतया खँ पिहां वयाच्वंगु दु । जलश्रोतया क्षेत्रय् लगानी यायेगु कथं अमेरिकी सहयोग नियोग एमसीसीपाखें डलरया लोभत पिहां वयाच्वगु दु । थ्व इलय् नं न्हापानिसें झीथाय् कुटनीतिज्ञ व राष्टिय स्तरया राजनीतिज्ञतय्सं यानावंगु ज्याखंयात धाःसा लुमंकेगु ई वयाच्वंगु दु । जब मोहनशमशेर प्रधानमन्त्री जुल, अब्ले सन् १९५० या सन्धी जुल । थ्व काइदा आः नं लिसा लिसा कायेत्यंगु दु । राणा प्रधानमन्त्री मोहन शमशेरया छय् पशुपतिशमशेर जबरा बिक्रम संवत २०५३ सालय् नं आः प्रधानमन्त्री जुयाच्वंम्ह शेरबहादुर देउवा तुं प्रधानमन्त्री जुयाच्वंगु इलय् देसय् राष्टिय प्रजातन्त्र पार्टीपाखें जलश्रोतमन्त्री जुयाच्वंम्ह खः । उगु इलय् नं आः थें हे पशुपतिशमशेर जबरां देशघाती महाकाली सन्धी पारित याकेत ग्वाहालि याःगु खः । उकिया मूल कारण धइगु पशुपति शमशेर राणाया सम्पत्ति स्वयेगु खःसा आः नं ९० प्रतिशत भारतय् लानाच्वंगु दु ।
नेपालय् शासन याइपिं प्रधानमन्त्री जुइपिं गुलिं भारतय् हे जन्म जूपिं, गुलिं भारतय् जन्म जुयाः नेपाली नागरिकता कयाच्वंपिं व गुलिं भारतय् नं नागरिकता दुपिं व नेपालय् नं नागरिकता दुपिं भारतमुखी ब्यक्तित जूगुलिं भारतया स्वार्थ अःखः उमिसं छुं नं ज्याखँ याये मफयाच्वंगु खः । थ्व इलय् नं एमसीसी पारित याकेगु देउवा सरकारया नीति दु । थ्व नीति ताःलाकेगु निंतिं नं लकडाउनया हल्ला यानां जिल वा प्रतिवन्धात्मक नियम लागू यानां जिल आः नं नेपाल सरकारं भारतयात लय्तायेकेगु स्वयाच्वंगु दु । थ्व धइगु छगू ल्याखं राजनीति व कुटनीतिइ ब्यक्तिगत सम्पत्तियात प्रश्रय बीपिं लोभीतय् कारणं जूवंगु खः ।
...
All Comments.......
Please Login/Register To Comments