- Post Date 2022-01-18 12:57:16
कृष्ण प्रजापति
ग्वसाःखलकं थाय् मागया नितिं ब्यूगु निवेदनय् ‘राष्ट्रया अमनचयन, सुव्यवस्था कायम यायेत लिसें थीथी संकटपाखें मुक्ति कायेगु नितिं सती श्राप मुक्ति श्री शिवशक्ति महायज्ञ यायेगु जूगुलिं नारायणहिति राजदरबार दुनेया पूजा छेँ यज्ञस्थल पायछि जुइगु’ न्ह्यथनातःगु दु ।
नारायणहिति दरबार संग्रहालयदुने माघ १९ गतेनिसें २९ गतेतक महायज्ञ याइगु जूगु दु । तत्कालीन जुजु खलकं पूजाआजा याइगु पूजा क्वथाय् ‘हजुरयात नमस्ते परोपकारी अभियान व श्री सतिश्राप मोक्ष धाम’ नांया संस्थां ‘सतीश्राप मुक्ति श्री शिवशक्ति महायज्ञ’ यायेत्यंगु खः । दरबार दुने न्हापांगुखुसि यज्ञ यायेत्यंगु स्रोतं जानकारी ब्यूगु दु । जुजु विरेन्द्रया निवास श्रीसदनय् च्वंगु पूजा क्वथाय् आः सर्वसाधारणया नितिं खुल्ला याःगु मदुनि । खुल्ला हे मयाःगु थासय् महायज्ञ यायेत नारायणहिति दरबार संग्रहालय व गणतन्त्र स्मारक व्यवस्थापन व संचालन समितिं स्वीकृति ब्यूगु दु ।
समितिया नायः पर्यटन मन्त्रालयया सचिव महेश्वर न्यौपानेया अध्यक्षताय् च्वंगु समितिया पुस १२ गतेया मुँज्यां स्वीकृति बिइगु निर्णय याःगु खः । समितिया निर्णयस धयातःगु दु, ‘थुगु दरबार परिसरय् श्री सति श्राप मोक्ष धाम व हजुरयात नमस्ते परोपकारी अभियानया मंकाः ग्वसालय् तिथि २०७८ माघ १९ निसें २९ गतेतक सती श्राप मुक्ति श्री शिवशक्ति महायज्ञ यायेगु धैगु निवेदन उपर विचार यानाबलय् नेपाली सेनालिसे समन्वय यानाः सीमित मात्राय् भक्तजन दुकायेगु व्यवस्था याना, संग्रहालयया सुरक्षाय् लिच्वः मलाइगु कथं स्वीकृति बिइगु निर्णय जुल ।’
ग्वसाःखलकं थाय् मागया नितिं ब्यूगु निवेदनय् ‘राष्ट्रया अमनचयन, सुव्यवस्था कायम यायेत लिसें थीथी संकटपाखें मुक्ति कायेगु नितिं सती श्राप मुक्ति श्री शिवशक्ति महायज्ञ यायेगु जूगुलिं नारायणहिति राजदरबार दुनेया पूजा छेँ यज्ञस्थल पायछि जुइगु’ न्ह्यथनातःगु दु । निवेदनय् अभियानया नायः ताराबहादुर कुँवर व धामया दांभरी वीरेन्द्रराज दाहालं ल्हाःचिं तःगु दु । महायज्ञया विषयस आधिकारिक जानकारी मदूगु समितिया सुचं अधिकारी बुद्धिबहादुर गुरुङं धाःगु दु । गुरुङं धाःगु दु, ‘जिं नं न्यनागु जक खः । आधिकारिक जानकारी मदु ।’
...
All Comments.......
Please Login/Register To Comments