- Post Date 2022-01-23 10:37:32
कृष्ण प्रजापति
चुनाब छु खः ? निर्वाचन गथे जुइ ? थ्व खँ नेपाली जनतां २०१५ सालनिसें आः तक जूगु निगू दर्जन निर्वाचन प्रक्रियां स्पष्ट खंके धुंकूगु दु । परिवर्तन व क्रान्तियात पनेगु निंतिं व न्हूगु शासन सत्तायात अनुमोदन याकेगु निंतिं जक थन चुनाव वा निर्वाचनया ज्याखँ जुयाच्वंगु झीसं स्यू । २०१५ सालय् प्रजातन्त्र वये धुंकाः दक्कलय् न्हापां आम निर्वाचन जूगु खः । उगु इलय् २००७ सालया क्रान्तिया नेतृत्व याःगु शक्ति प्रजा परिषद अन ला थन ला मदया वन । थ्व ल्याखं झीगु देसय् जुइगु हरेक क्रान्ति व जन आन्दोलन लिपाया परिवर्तन लिपा शासन सत्ताय् वइपिं शक्ति सदां भारतीय बिस्तारवाद व अमेरिकी साम्राज्यवादया समर्थन याइगु व दरवारीया शक्ति हातय् दुगु शक्ति जक न्ह्यःने वयाच्वने फुगु खँय् धाःसा निगू मत मदु । उकिं नं नेपाःया कम्युनिष्ट आन्दोलनय् मू शत्रु सुयात माने यायेगु धइगु खँय् सदां बादबिवाद जुया हे च्वनी । गुम्हेसियां भारतीय बिस्तारवाद झी नेपाःमि जनताया लागिं मू सत्रु धयाच्वंगु दुसा गुम्हेसियां जुजु वा दरवार ।
थुगु विवादया दथुइ पंचायती शासन लागू जुइवं स्वीदँ तक पंचायती शासन लागू याःगु कारणं जुजु वा राजा हे देसय् मू सत्रु खः कि धइगु नं खने दयाच्वंगु खः । तर आः तकं नेपाःया सुं नं प्रधानमन्त्री भारतया पूर्ण समर्थन मदयेकं प्रधानमन्त्री जूगु रेकर्ड मदुगु कारणं वास्तबय् नेपाःया निंतिं मू शत्रु धइगु हे भारतीय बिस्तारवादी शक्ति खः धइगु स्पष्ट क्यनाच्वंगु दु । २०३६ सालय् जनमत संग्रह याके धुंका २० लाख मत विरुद्ध २४ लाख मत क्यनाः पंचायती शासन ब्यवस्थायात नेपाली जनतां अनुमोदन याःगु घोषणा यात । वयां लिपा वःगु सुधारिएको पंचायती ब्यवस्थां २०३८ साल बैशाख २७ गते राष्टिय पंचायतया निर्वाचन याकल नं पंचायती ब्यवस्थायात तुं हाकनं छक्वः अनुमोदन याकेगु निंतिं याकल । वयां लिपा २०३९ सालया स्थानीय निर्वाचन याका जनतां ल्यःपिं पंचतय्त पंचायती शासकतय्सं थः दास सरह ब्यवहार यायेगु याना यंकल । उकिया हे बदला स्वरुप २०४३ सालं जूगु राष्टिय पंचायतया चुनाव व २०४४ सालं जूगु स्थानीय निकाय निर्वाचन लिपा देसय् प्रजातन्त्रया निंतिं सः थ्वयावल ।
पंचायती ब्यवस्था नष्ट यायेगु निंतिं नं दरवारलिसें तप्यंक तक्कर कायेगु शक्ति कथं अब्ले नेकपा (मसाल) व नेकपा (मशाल) नापं थीथी उग्र बाम घटकत न्ह्यःने वःगु खः । तर दरवारीया शक्ति स्वयां अति शक्तिशाली शक्ति भारतीय बिस्तारवादया समर्थन चूलाका च्याक्सीबारीइ सम्मेलन यानाः उगु शक्तिं पंचायती ब्यवस्था नष्ट यायेगु योजनायात ध्याकुनय्् लाका अब्ले न्हय्गू बाममोर्चा नापं जानाः नेपाली कांग्रेस आन्दोलन न्ह्यःने यंकल । थुकथं दरवारीया शक्ति स्वयां भारतीय बिस्तारवादी शक्ति मू दुष्मन कथं कम्युनिष्टतय्सं धयाच्वंगु खँ हाकनं छक्वः प्रमाणित जूवन । तर छगू इलय् पीएल वा पुष्पलाल थेंज्याःम्ह नेपाल कम्युनिष्ट पार्टीया संस्थापक महासचिवं धयादी कथं नेपाली कांगे्रस नापं जाना जनआन्दोलन सफल यायेगु पुलांगु काइदा धाःसा व मदये धुंका पूवन । २०४६ सालया आन्दोलन ताःलात । जुजु सहितया प्रजातन्त्र वल । बहुदल नं लागू जुल ।
तर २००७ सालं प्रजा परिषदं प्रजातान्त्रिक आन्दोलनया नेतृत्व याथें २०४६ सालय् संयुक्त जनमोर्चा दयेका आन्दोलन यानाच्वंगु उग्र आन्दोलनं बिश्राम मकाल । उमिसं चुनावय् ब्वति कयाः गुंगू सिट त्याकल नं सडक आन्दोलन व भूमिगत आन्दोलनयात निरन्तरता बिया यंकल । मध्यावधि निर्वाचन लिपा २०५१ साल फागुण १ गतेनिसें ला जनयुद्ध घोषणा यानाः बहुदल न सहुदल गणतन्त्र व समाजवादया नारा बिया उपिं न्ह्यःने वल । थ्व आन्दोलन नं आखिर संसद पुनस्थापनाया माग यानाः जुजुया बिरोधय् आन्दोलन यानाच्वंगु शक्ति नापं जाना जक सफल जूवन । जनयुद्ध समाप्त जुल । थुकथं नेपालय् सही क्रान्तिकारी शक्तियात आः तक नं बिस्तारवादी भारतीया शक्ति व दरवारीया शक्तिं लिउने लाकातःगु खनेदु । थ्व धइगु आन्दोलन वा संघर्ष न्ह्यःने वयेवं वयेवं निर्णायक घडीइ फाइदा कयाः मेगु शक्तिं शासन सत्ता लाकीगु वा मू आन्दोलनयात मेथाय् फ्वाइगु खः ।
राणा शासनया अन्त्य याना बहुदल वःगु इलय्, प्रजातन्त्र पुनः स्थापना यायेत जूगु जनआन्दोलन ताःलागु इलय् व गणतान्त्रिक अभियान सफल जुयाः संविधानसभां न्हूगु संविधान दयेकूगु इलय् तकं थन आन्दोलनया सुरु याःगु शक्तिं मखु कि मेमेगु बैकल्पिक शक्तिं जक अप्वः फाइदा कयाच्वंगु दु । थ्व ल्याखं झीथाय् आः नं जनताया शासन धाःसा सुुरु जूगु मदुनि । खाली थन पूँजीपति वर्गं निर्वाचनया नामय् शोषणयात अनुमोदन यानाच्वंगु दु । वास्तवय् निर्वाचनं क्रान्ति व समाजवाद सम्भव नं मदु । निर्वाचन ला खाली शोषक वर्गं थःपिनि शोषण यायेगु दायरा तब्याकेगु ज्या जकं खः । आः नं गुगु दिनय् निर्वाचन यायेगु धकाः प्रधानमन्त्रीं घोषणा याःगु खः । उकुन्हुनिसें हे पेटोलियम पदार्थया भाः प्रतिलिटर खुतका दां अप्वयेकल । थुकिं भारतीय बिस्तारवादयात फाइदा जुया नेपाली उपभोक्तात मारय् लाःवंगु दु । तप्यंक पूँजीपतितय्सं चुनाव खर्च उठे याइगु जूगु दु ।
स्थानीय तहया निर्वाचन मयाकेगु निंतिं सत्तारुद दलया नेतात माधव नेपाल, झलनाथ खनाल, शेरबहादुर देउवा व पुष्पकमल दाहाल प्रचण्डपिं लगे जुयाच्वंगु खः । तर देसय् चुनाव यानाः थःपिंत सेवा याइम्ह न्हूम्ह सल ल्ययेगु ज्या भारतीय बिस्तारवादयात हथाय् जुयाच्वंगु दु । केपी ओलीयात लिम्पियाधुरा व लिपुलेक सहितया कालापानी लागा नेपालय् लानाच्वंगु न्हूगु राजनीतिक नक्सा सार्वजनिक यायेवं हे सत्ताच्यूत यानाबिल । अथेंतुं न्हूगु सरकार नं थःपिसं धाथें च्वनीम्ह ल्ययेगु थ्व इलय् भारतीय बिस्तारवादया चाहना जुयाच्वंगु दु । उकिं नं थन एमसीसी पास याकेगु खेल भारतीय पक्षं म्हिताच्वंगु दु । महामारी व लकडाउन यायेगु त्वह तयाः थीथी कथं दुनं दुनं जुयाच्वंगु कासा प्रति नेपाली जनता सचेत जुइमाःगु दु । आन्दोलन व युद्ध यायेत सदां न्ह्यःने लाकेगु अले उकिया उपलब्धी धाःसा छप्तिं हे थःत मदइगु नेपाःमि जनताया थ्व तसकं दुर्भाग्यया खँ खः । आः नं छपुचः चलाक मनूतय् ल्हातय् शासन सत्ता लानाच्वंगु दु । जनयुद्ध व जनआन्दोलनय् जिउ ज्यान पाना जूपिं योद्धातय् कदर जुयाच्वंगु मदुनि । जनआन्दोलन दिवसं थुगु गम्भीर समस्यायात वाःचायेकीगु आशा यानाच्वंगु दु ।
...
All Comments.......
Please Login/Register To Comments