- Post Date 2022-01-24 11:30:29
कृष्ण प्रजापति
नेकपा एमालेया चुनाव चिं सूर्य मजुइगु अवस्था वःगु दु । एमालें उगु चिं पुनरावलोकन यायेमालीगु अवस्था जूगु खः । निर्वाचन आयोगं थुकिया संकेत यायेधुंकूगु दु ।
निर्वाचन आयोगं राष्ट्रिय प्रजातन्त्र पार्टीयात ‘सा’ चिं चिइकेत पौ छ्वयेधुंकूगु दु । माघ २ गते छ्वःगु पतिइ ‘नेपाःया राष्ट्रिय ध्वाँय्, निशान छाप, राष्ट्रिय स्वाँ लालीगुराँस, राष्ट्रिय रंग सिम्रिक, राष्ट्रिय जनावर सा, राष्ट्रिय पंक्षी डाँफे, नेपाःया नक्सा, राष्ट्रिय पहिचान कुबियातःगु व्यक्तित्वया किपाः वा चिं दलयात प्रदान मयायेगु व यायेधुंकूगु जूसा उकिया पुनरावलोकन यायेगु’ धैगु निर्णयलिसें न्ह्यथनातःगु दु । आयोगं थुकिया बारे २०७७ माघ ७ गते निर्णय जूगु धासें राप्रपायात सा चिं दूगु धैगु वाक्यांश चिइकाः विधानय् उल्लेख यायेत धाःगु दु ।
आयोगया उगु पौया आधारय् राप्रपा अदालत वनीगु जूगु दु । थ्व मुद्दा आः अदालतय् वनीगु जूगुलिं आयोगया निर्णयया पक्षय् फैसला जुयाः आदेश जूसा राप्रपाया सा चिं जक मजूसे एमालेया सूर्य चिं तकं बदर जुइगु जूगु दु । आः चुनाव चिंया विषयस अदालतय् अलमल जुइगु जूगुलिं नं प्रतिनिधिसभा चुनाव लिहाँ वनीगु सम्भावना दूगु सीदूगु दु । अदालतं थुकिया बारे याइगु निर्णयया लिपा न्हापां नं प्रतिनिधिसभा चुनाव जक मजूसे स्थानीय चुनाव व प्रदेशसभा चुनावया तिथिइ तकं लिच्वः लाइगु सम्भावना दु । राप्रपाया चुनाव चिं सा राष्ट्रिय जनावर खः । एमालेया चुनाव चिं सूर्य राष्ट्रिय ध्वाँय् दुने अंकित दु । आयोगं याःगु निर्णय कथं आः एमालेया चुनाव चिं तकं पुनरावलोकन यायेमालीगु जूगु दु । एमालें सूर्यया पलेसा मेगु चुनाव चिं ल्ययेमालीगु अवस्था वइगु सम्भावना दु ।
...
All Comments.......
Please Login/Register To Comments