- Post Date 2022-02-27 04:55:37
कृष्ण प्रजापति
सत्तारुढ नेकपा माओवादी केन्द्र व एकीकृत समाजवादी पार्टीं गठबन्धन बचेयायेगु व अमेरिकी सहयोग परियोजना मिलेनियम च्यालेञ्ज कर्पोरेसन (एमसीसी) नेपाल कम्प्याक्ट सम्झौता अनुमोदन नं जुइके बिइगु लँपु ल्यःगु दु ।
एमसीसीया हे हुनिं गठबन्धन त्वाःदलीगु अवस्था वयेधुंकाः निगुलिं दल विपक्षय् मत बिइगु अडानं लिच्यूगु खः । आः निगुलिं दलं एमसीसी अनुमोदनया नितिं निर्णयार्थ पेश याःबलय् पास जुइगु लकस दयेकेत संसद बहिष्कार याइ । इमिसं थ्व जानकारी प्रधानमन्त्री शेरबहादुर देउवायात बिइधुंकूगु दु । माओवादी केन्द्रया छम्ह नेतां धाःगु दु, ‘आः गठबन्धन बचे हे यायेमाःगु जूगुलिं एमसीसी अनुमोदनया नितिं निर्णयार्थ न्ह्यःने वःबलय् जिमिसं बहिष्कार यानाः ग्वाहालि यायेमाःगु जुल । प्रधानमन्त्री देउवायात थ्व जानकारी बिइधुनागु दु । सम्भवतः संसदया वइगु बैठकय् एमसीसी अनुमोदन जुइ ।’ माओवादी केन्द्रया शुक्रवाः च्वंगु पूर्वस्थायी कमिटी दुजःपिनिगु बैठकं नं गठबन्धन बचेयायेगु लिपांगु तकया कुतः यायेगु निर्णय याःगु दु ।
छम्ह नेतां धाःगु दु, ‘गठबन्धन बचेयायेत लिपांगु ईतक कुतः यायेगु धाःगु मतदानय् सहभागी मजुइगु धाःगु खः । आः माओवादी व एकीकृत समाजवादीं एमसीसीय विरुद्धय् भाषण यानाः बहिष्कार याइ । कांग्रेस, जसपा व लोसपां पक्षय् मतदान याइसा एमालें वेल घेरेयाइ, अथे जुइबलय् एमसीसी पास जुइ, गठबन्धन नं बचेजुइ ।’ शुक्रवाः हे कानूनमन्त्री दिलेन्द्रप्रसाद बडुं सभामुख अग्नी सापकोटायात नापलानाः एमसीसी अनुमोदनया संसदीय प्रक्रियाबारे सरकारया धारणा जानकारी ब्यूगु दु । सैद्धान्तिक सहलह दुने हे मत विभाजन याकेगु संसदीय प्रक्रिया मदूगु धासें वं सभामुखया धारणा माग याःगु खः ।
लिसलय् सभामुख सापकोटां थुकिया बारे थःगु छुं धारणा मदूगु व फुक्क विषय थःथवय् सहलह व सहमतिया हे आधारय् न्ह्यःने वनाच्वंगु जानकारी ब्यूगु खः । वधुंकाः प्रतिनिधिसभा बैठक स्थगित याःगु खः । वयां लिपा हाकनं मन्त्री बडु व सभामुख सापकोटादथुया संवादय् ध्वनि मतया आधारय् एमसीसी अनुमोदन यायेबलय् गठबन्धन बचेजुइफूगु जूगुलिं ग्वाहालि यायेत सभामुखयात आग्रह याःगु खः । बिहिवाः कांग्रेसलिसे निगू चरण व माओवादी केन्द्रलिसे जूगु सहलहस एमालें सभामुख अग्निप्रसाद सापकोटाया बहिर्गमन व १४ म्ह सांसदया पद खारेजीयात पूर्वशर्तया रुपं न्ह्यःने यंकूगु खः । तर एमाले व कांग्रेसदथुइ सहलह ताःहाकः जुइधुंकाः माओवादी केन्द्र व समाजवादीया ध्यान उखेपाखे वंगु खः ।
...
All Comments.......
Please Login/Register To Comments