- Post Date 2022-02-28 04:42:42
कृष्ण प्रजापति
नेपाल कम्युनिष्ट पार्टी औपचारिक रुपं २००६ सालय् दरभंगाय् स्थापना जूगु खः । नेपालय् राणा शासन चले जुयाच्वंगु इलय् प्रवासय् च्वंपिं नेपाःमितय्सं नेपालय् क्रान्तिया शंखघोष यानाः कम्युनिष्ट पार्टी नीस्वंगु खः । कम्युनिष्ट पार्टी नीस्वंगु इलय् मुक्कं प्यम्ह वा न्याम्ह जक च्वनाः पार्टी नीस्वंगु खः । तर थौं लखौं नेपाःमि जनतां कम्युनिष्ट पार्टीया सदस्यता कयाः उकि समाहित जूवनाच्वंगु दु । विचार, सिद्धान्त वा छगू आस्था धइगु उकथ प्रारम्भय् म्हो जक मनू वा छम्ह निम्ह मनूतय्सं सुरु याइगु खः । सिद्धार्थ कुमारं दरवार त्याग यानाः कयौं दँ लिपा प्रारम्भ याःगु बुद्ध शिक्षां थौं तकं संसारय् शान्ति कायम यायेत ग्वाहालि यानाच्वंगु दु । जीसस् क्राइष्टं प्रारम्भ याःगु अहिंसावादी आन्दोलनं थौं तकं संसारयात लँ क्यनाच्वंगु दु । अथेंतुं कार्ल माक्र्स व फ्रडेरिक एगेल्सं प्रतिवादन यानाथकूगु माक्र्सवादी विचारधारां थौं कम्युनिष्ट वा वाम घटकतय्गु निर्देशक सिद्धान्त कथं ज्या यानाच्वंगु दु । उमित लँ क्यनाः देश, काल, परिस्थितियात थुइक ज्या यायेत अःपुकच्वंगु दु ।
नेपालय् कम्युनिष्ट आन्दोलनया जग स्वनेगु ज्या पुष्पलाल श्रेष्ठ, नरबहादुर कर्माचार्य, नारायणविलाश जोशी व नरगोविन्द वैद्यपिसं यानावंगु खः । अथे खःसां उकियात च्वन्ह्याकेत धाःसा तत्कालीन किसान आन्दोलनं आपालं आपा ग्वाहालि याःगु खनेदु । रौटहतय् जूगु किसान बिद्रोह, ख्वपय् न्ह्याकूगु बाली काट्ने आन्दोलन, साँधे धपाऊ आन्दोलन, भर्पाइ आन्दोलनं कम्युनिष्ट पार्टीया जग स्वनेगु ज्या जुल । पार्टीयात देशब्यापी यायेगु खँय् धाःसा माले, माक्र्सवादी लेनिनवादी पार्टीं भूमिगत रुपं ज्या यानाच्वंगु इलय् पंचायती शासन कालय् याःगु प्रहरी दमन व पंचायती अत्याचारं नं आपालं ज्या याःगु खनेदु । उकि किसान आन्दोलन दक्कलय् च्वन्ह्याःगु अंश कथं कायेजिउ । ख्वपया सन्दर्भयात जक दुवलेगु खःसा किसानतय् बुईं बुईं वनाः किसान न्ह्यलुवातय्सं बाली लया दुत हयाबियेगु, बाली पुवनीगु इलय् लिसें वनाः जूसां भर्पाइ कया त्वतेगु, बाली नकेगु कथं त्वतातःपिं छाडा दोंसातय्त नगरकोट पारी देउपुर थ्यंक लिना यंकेगुनिसें कयाः उकिया विरुद्ध महाद्यःयात पितिनिपिं धाधां किसानतय्त हातपात याःगु इलय् उग्र रुपं उकिया विरोध व सामना याःगु घटनां कम्युनिष्ट पार्टीया स्थान काल ।
किसान आन्दोलनं समाजवादी अभियान ताःलाइ धइगु अब्ले सोच दयेधुंकूगु खः । तर कम्युनिष्ट पार्टी दुनेया संशोधनवादी तत्वतय्सं किसान आन्दोलनया नेतृत्वकारी शक्तियात धोखा बिउगु कारणं अब्ले किसानतय्गु आन्दोलनं विश्राम कायेत बाध्य जूवन । पंचायती शासकतय्सं किसानतय् उगु उग्र ढंगं न्ह्यानावंगु जमिन्दार विरोधी शक्ति खना ग्यानाः आपालं मनू ज्वनेगु, कुनेगु व यातना बियाः जेल तयेगु ज्या यायेवं छगू ल्याखं सिथिल जूवंगु कम्युनिष्ट आन्दोलनयात ग्वाका तयेत नं किसान आन्दोलनं बल्लागु मि पुसाया ज्या याःगु खः । त्वाः त्वालय् किसानतय् पुचः दयेकाः चां न्हिं शोषक वर्गया विरुद्ध वर्ग संघर्ष न्ह्यःने यंकेत अब्ले किसानतय्सं यानावंगु बलिदानया थःगु हे इतिहास दु । अब्लेया थ्व किसानतय्गु योगदानयात आः न्हूगु पुस्ता तक थ्यंकेत अन्तर्वार्ता, जीवनी वा संवादयात रेकर्ड याना वा प्रशारण याना नं न्हूगु पुस्तां कम्युनिष्ट पार्टीयात थुइकेगु व अब्लेया संघर्ष बारे जानकारी बियाः न्हूगु पुस्तायात पाठ स्यनेगु आवश्यक जूवनाच्वंगु दु ।
माक्र्सवाद व लेनिनवाद बारे हाल यक्वः सामग्री नेपाली भासं ब्वनेगु अवसर चूलाके फइगु जूगु दु । न्हूगु पुस्तायात अज्याःगु सामग्रीया अध्ययन याकेगु वातावरण दयेकेमाः । देश व जनतायात धोखा बियाः पूँजीवादी सत्ता कब्जा यायेत लालायित शक्तियात गुकथं कम्युनिष्ट शक्ति धायेफइ धइगु तर्क यायेगु शक्ति नं अब्ले जक नेपाली जनतायाके ब्वलनी । थन खःसां मखुसां छुं छगू निगू कम्युनिष्ट नामं ज्या यायेवं कम्युनिष्ट पार्टी जुइगु नं चलन सुरु जूगु दु । म्हिगःनिसें कम्युनिष्ट आचरण कथं ज्या याना वयाच्वंगु शक्तियात राजनीतिक पार्टी तकं मखुथें च्वंकेत नं स्वयाच्वंगु दु । अझ नेपालं पिने नीस्वंगु जूसां नेपाः दुने हयेधुंक सिना सिना ज्या यानाच्वंपिं जेल नेल भोगे याना जूपिं आपालं कम्यनिष्ट अग्रजतय्गु इतिहासय् नां तकं उल्लेख जुइफुगु मदुनि । थ्व खँय् नं वर्तमान नेतृत्व शक्तिं विचाः यायेमाः ।
कम्युनिष्ट पार्टी नीस्वंगु इलय् देशय् प्रजातन्त्र व गणतन्त्र स्थापना यायेगु निंतिं मजदुर किसान जनतायात संगठित यायेगु मू लक्ष्य तःगु खः । तर थौं उकथं संगठित यायेगु व उमित राजनीतिक चेतना बियाः क्रान्तिया लागिं तयार यायेगु ज्या गौण जुयाच्वंगु दु । मू ज्या हे गौण जुइधुंक अब्ले तःगु उद्देश्य कथं ज्या जुइगु नं म्हो जुयाच्वंगु दु । खाली थन कम्युनिष्ट नां छगू ब्वयाः पूँजीवादी धार कथं ज्या यायेगु परिपातिया विकास जूवनाच्वंगु दु । थ्व जूगु कारणं नं अब्ले किसान आन्दोलन हे कम्युनिष्ट पार्टी थकायेगु जग जुयाच्वंगु खःसा आः निम्न पूँजीपति वर्ग व ब्यापारीतय् कब्जाय् थीथी कम्युनिष्ट घटकत लाये धुंकूगुलिं खः । किसान बिद्रोह व किसान आन्दोलन अब्ले थें आः कम्युनिष्ट पार्टीया जग मखये धुंकल । भट्टा साहुत, घरजग्गा दलालीत, करोडौं धनसम्पत्तिया मालिकतय्गु भरय् पार्टी चले यायेत स्वयेवं जुइगु थ्वहे खः । थ्व आः सुनानं चीके स्वल नं चिला मवनीगु जूगु दु ।
मानवीय कमजोरीयात थुइक गल्तीयात क्यनीपिं धात्थेंपिं पासा जुइ । तर ह्ययेकाः, लोभ क्यनाः गालय् क्वफ्वायेत स्वइपिं शत्रु जुइ । कम्युनिष्ट आन्दोलन दुने नं अज्याःगु हे सिद्धान्त लागू जुइ । पंचायती ब्यवस्था दुनं हे संघर्ष यायेमाः धइगु छगू पक्ष व कम्युनिष्ट जुयाः दरवार नापं सतीक च्वने मजिउ धइगु मेगु पक्षया दथुइ सुरुनिसें संघर्ष जारी हे जुयाच्वंगु खः । आः नं कम्युनिष्ट पार्टीयात सामन्तवाद मू शत्रु खः कि भारतीय विस्तारवाद हे मू शत्रु खः धइगु भ्रम ल्यनाच्वंगु दनि । म्हिगः किसान आन्दोनल चले जूगु इलय् मू दुश्मन सामन्त वा जुजु थें च्वंसां आः एमसीसी पारित याकेत स्वइपिं शक्ति वा भारतीय व अमेरिकी साम्राज्यवाद देय्या मू शत्रु खः धइगु खने दयाच्वंगु कारणं कम्युनिष्ट पार्टी दुने न्हापानिसें सामान्तवाद मू शत्रु वा भारतीय एकाधिकार पूँजी मू शत्रु धइगु खँय् आः झन झन् स्पष्ट खने दया वयाच्वंगु दु । उकिं नं नेपाःया किसान आन्दोलनयात अझ बृहत्त याना थ्व इलय् किसान बिद्रोह मार्फत् नेपालय् क्रान्तिया वातावरण तयार यायेमाः ।
...
All Comments.......
Please Login/Register To Comments