- Post Date 2022-03-06 12:36:47
कृष्ण प्रजापति
११२ क्वःगु अन्तर्राष्टिय महिला दिवसया लसताय् न्हापांगु पलाः नेवाः मिसा पुचःया ग्वसालय् जेष्ठ मिस्तय्त हनेज्या जुल । येँ महानगरपालिकाया उपमेयर हरिप्रभा खड्गी श्रेष्ठं वय्कःपिंत हना थीथी कथंया समाग्री नं लःल्हानादीगु खः । ज्याझ्वलय् समाजसेवी यज्ञरत्न धाख्वां मृत्य खनाः ग्यापिं मनूत न्हिन्हिं सिनाच्वने मालीगु खँ कनादिसें झीगु जीवन लः थें बाः वनाच्वनीगु जूगुलिं जीवन दुबलय् हे छुं यायेमाः धयादिल । वय्कलं दुःख मदुपिं सुं दइमखु, कन्हय् धइगु गब्लें वइमखु धयादिसें थःगु जीवन सुथां लानाच्वंगु इलय् हे समाजया लागिं छुं यानाक्यनेमाः धयादिल ।
नेपाल व चीन लागा निगुलिं थासं सगरमाथाया सफल आरोहण याना विश्व कीर्तिमान तयेत ताःलाम्ह ब्यक्तित्व कल्पना महर्जनं थःगु पारिवारिक जिम्मेवारी नापनापं समाजं म्हसीकेगु निंतिं थःम्हेसियां कठीन स्वयां कठीन परिस्थितिइ नं श्रम व मेहनतयात मू मन्त्र यानाः ज्या याना वनेमाःगु खँय् बः बियादिल । उगु ज्याझ्वलय् सभासद् राज्यलक्ष्मी श्रेष्ठं थीथी सामग्री लःल्हानादिसें मां बाया सेवा थेंज्याःगु तःधंगु ज्या मेगु छुं नं मदुगु तर्क तयादिल । न्हापांगु पलाः नेवाः मिसा पुचःया नायः मय्जु शिला साय्मिया सभापतित्वय् जूगु ज्याझ्वलय् सगरमाथा आरोही न्हापांम्ह महिला पत्रकार कल्पना महर्जन, सुजिता डंगोल, १०५ दँया बुद्धिमाया मजर्हन व बेटी मर्जनपिंत विशेष सम्मान याःगु खःसा जंक्वः सिधुपिं स्वंगू दर्जन स्वया अप्वःसित वडा अध्यक्ष राजेन्द्र मानन्धर लगायतं हनेज्या यानादीगु खः ।
...
All Comments.......
Please Login/Register To Comments