- Post Date 2022-03-15 16:04:41
कृष्ण प्रजापति
ख्वपय् घरेलु अय्लाः मियाः थीथी कथंया नोक्सान जूगु धाःसे जिल्ला प्रशासन कार्यालयं अय्लाः ब्यापारीतय्त विशेष निगरानी तःगु दु । थनया च्याम्हसिह, देक्वचा, लिबालिबि व सूर्यविनायक लागाय् उकथ लाइसेन्स विना पसः तयाः घरेलु उत्पादन यानातःगु अय्लाः मिइपि स्थानीय पसःतय्त कारवाहीया ज्या न्ह्याकाच्वगु दु । न्हूम्ह एसपी शिवकुमारा श्रेष्ठ वयेधुक न्हापांगु पलाः कथं थुकथं घरेलु मदिरा नष्ट यायेगु ज्या जुयाच्वगु खँ प्रहरीं धाःगु दु । थौंकन्हय् प्रहरीं थाय् थासय् च्वंगु पसलय् छापा मारे यानाः ज्वना यंकेगु व जरिवाना पुइकेगु यानाच्वंगु दु ।
चाँगुनारायण नगरपालिका मिलि हनुमान ईट्टा भट्टा नापं अय्लाः पसः तयातःम्ह सरिता बस्यलं कनादी कथं मिलि लागाय् च्वंगु झ्वःलिकया प्यंगू पसलय् प्रहरीं छापा मारे यानाः जरिवाना याकूगु दु । वय्कःया कथं अन प्रमाणपत्र मदयेकं खुल्ला रुपं मिइगु अय्लाः त्वनाः मिजंत भट्टाया थःगु झ्वाउलिइ मवंसें बेहोस पूर्वक मेमेपिं मिस्त द्यनाच्वंगु थासय् वनाः द्यँवनेवं उगु काण्ड सुरु जूगु खः । अथेहे अय्लाः त्वनाः होहल्ला याना जूगु धासें थ्व स्वयां न्ह्यः लिबालिबिइ च्वंगु छगू पसलं प्रहरीं प्यम्हसित ज्वनाः चछि चौकी कुनाः त्वताहःगु खः । थज्याःगु घरेलु अय्लाः मियेगु ज्या याइम्ह साःकुलानया छम्ह अय्लाः ब्यापारी राजकुमार मानन्धर सिइवं झन् अप्वः प्रहरीं निगरानी अप्वः यानाच्वंगु स्थानीयतय्सं धाःगु दु । च्यादँ न्ह्यः सरकारं चुरोट अय्लाः छथाय् तयाः मिये मदइगु व प्रमाणपत्र बिना मिल धाःसा कारवाही यायेगु धाःगु खः । तर थ्व नियम अःपुक लागू जुयाच्वंगु मदु । मेखे ख्वप नगरपालिकां नं पाइप लाइन नापं थीथी थासय् घरेलु मदिरा मिइपिं नापं थीथी ब्यापारीतय् विशेष निगरानी तयाः अनुगमन यायेगु ज्या जुयाच्वंगु व नाप तौल पाय्छि जू मजू स्वयेत ब्यापारीतय्त थःपिनि ढक तराजु जाँच यायेत सुचं पिकयाः थाय् तकं क्वछिनातःगु दु ।
...
All Comments.......
Please Login/Register To Comments