- Post Date 2022-03-20 08:26:25
कृष्ण प्रजापति
नेपालय् प्रजातन्त्र वःगु थौं न्हय्निदँ दये धुंकल । प्रजा परिषद कथं नेपालय् बिक्रम संवतया १९९७ सालय् हे पार्टी राजनीति सुरु जूगु खः । थ्व छगू कथं प्रजातान्त्रिक अधिकार सुनिश्चित यायेगु ताः तयाः स्थापना जूगु पार्टी खः । नेपालय् जक मखु संसारय् न्ह्यागु नं देसय् राजनीतिक पार्टी धइगु बैचारिक शक्ति खः । नेपाली कांग्रेस २००४ सालय् जक स्थापना जूगु पार्टी व नेपाल कम्युनिष्ट पार्टी २००६ सालय् स्थापना जूगु पार्टी स्वयां प्रजा परिषद विक्रम संवत् १९९७ सालय् हे गोप्य रुपं स्थापना यानाः थीथी कथं राणाबिरोधी गतिविधि यायेधुंकूगु दल जूगुलिं झीथाय् राजनीतिक पार्टीया इतिहास दुवाला स्वयेगु खःसा दक्कलय् पुलांगु पार्टी प्रजा परिषद् खः । तर राणा शासन पतन यायेगु उद्देश्य ज्वनाः नीस्वंगु थुगु पार्टी राणा शासन पतन नापं अस्तित्वबिहिन जूवन । आः थ्व नां जकया पार्टी जुयाच्वंगु दु । छगू इलय् उगु ऐतिहासिक पार्टीया अध्यक्ष कथं येँ महानगरपालिकाया पुलांम्ह मेयर केशब स्थापितयात नियुक्त याये यंकूगु खःसां उकियात विधिवत ढंगं चले मयाःगु कारणं थ्व लुप्त अवस्थाय् दु ।
पार्टीया अस्तित्व तकं खने मदुगु गुलिं राजनीतिक पार्टीतय्सं देसय् उग्र ढंगं ज्या याना वनेवं तराई मधेश लागाया गुलिं पार्टीलिसें सरकारं सम्झौता यायेत बाध्य जुयाच्वंगु दु । तर थज्याःगु पार्टीत च्याउ वा म्हुकं बुया वइथें छक्वः खने दइगु व हाकनं लुप्त अवस्थाय् थ्यनीगु पार्टीत खः । थ्व बैचारिक व अस्तित्ववादय् विश्वास याइगु पार्टी मखु । वास्तवय् थ्व छुं छगू निगू स्वार्थ पूरा यायेत दयेकीगु हुलदंगा याइगु बवाब समूह कथं ज्या याइगु राजनीतिक पार्टीत खः । गोइत समूह, टाइगर समूह, फलाना समूह धिस्काना समूह धयाः वइगु चिचिधंगु नां जकया राजनीतिक पार्टी खना नं गब्लें गब्लें सरकार वाक्क दिक्क जुयाः वार्ता यायेत बाध्य जुयाच्वंगु दु । वास्तवय् थज्याःगु राजनीतिक पार्टीयात चुनाबय् ल्वायेगु, निर्वाचन आयोगय् दर्ता याकेगु वा राजनीतिक सेवा सुविधा बियेगु याये मजिउ ।
राजनीतिक पार्टी धइगु बैचारिक शक्ति हे जुइमाः । जनतायात थःगु सिद्धान्त, विचार व आदर्श प्रति आकर्षित यानाः उमित क्रान्ति यायेत तयार यायेगु राजनीतिक पार्टीया लक्ष्य जुइमाः । खाली दांगदुंग यानाः ख्यानाः छुं हिंसात्मक गतिविधि चले यानाः वा चौकी ध्वस्त यानाः अपराधिक ज्याखँत यानाः सत्ताय् थ्यंकेगु, गुण्डागर्दी यायेगु थेंज्याःगु छुं छगू निगू पार्टी खना राज्य लिचिलेगु ज्यां कन्हय् गम्भीर लिच्वः लायेफु । झीथाय् देसय् गणतन्त्र व संघीयता वये धुंकाः अज्याःगु राजनीतिक गतिविधि बाहेक नं अराजक गतिविधि अप्वयेकीपिं राजनीतिक पार्टीतय् अस्तित्व खने दयावःगु दु । थ्व बांलाःगु पक्ष धाःसा मखु । राजनीतिक स्वतन्त्रता अप्वयेवं खने दुगु पार्टीयात अवसरबादी पार्टी वा अवसरय् फाइदा कायेत दयेकूगु पार्टी धाःसां छुं पाइमखु । देय्या मूल कानून संविधानय् धार्मिक ल्याखं, जातीय ल्याखं वा क्षेत्रीय ल्याखं राजनीतिक पार्टीत चायेके मदइगु धयातःगु दु । शिव सेना नेपाल, गोइत पार्टी, तराईया थीथी पार्टीत स्थानीय चुनावय् प्रभाव लायेत नं अज्याःगु अदृश्य शक्तिया भरय् पार्टी चायेकेत लालायित जुयाच्वंगु दु ।
झीगु देसय् आः बैशाख ३० गते छगू हे चरणय् स्थानीय तहया निर्वाचन जुइगु जुयाच्वंगु दु । थ्व इलय् राजनीतिक पार्टीतय्सं चुनावी प्रचार गुकथं यायेगु व गुकथं थःपिनि पकड अप्वयेकेगु धइगु ध्यान केन्द्रीत यानाच्वंगु दु । पुलांगु राजनीतिक पार्टी जक मखु न्हू न्हूगु राजनीतिक पार्टीं नं स्थानीय चुनाबय् ब्वति कायेगु लागिं कसरथ सुरु यानाच्वंगु दु । स्थानीय निकाय धइगु विकास निर्माणया लागिं ज्या यायेगु मू ताःतुना निर्वाचनय् वनीगु खः । सदन वा संसद जूसा ऐन, कानून, नीति, नियम दयेकेत चुनाव जुइगु खः । तर स्थानीय तहपाखें देसय् विकासया खँ अप्वः जुइ । थ्व छगू स्वाभाविक चीज नं खः । छाय्धाःसा स्थानीय मनूतय् प्रत्यक्ष सरोकार दइगु धइगु स्थानीय तहपाखें खः । उकिं नं थुगुसी जुइत्यंगु स्थानीय तहया थ्व निर्वाचनय् न्हापा न्हापा त्याकाच्वंगु शक्ति व न्हू न्हूगु राजनीतिक शक्तिं नं बैचारिक शक्ति कथं ज्या याये फयेकेमाः । अन ध्यबा व अदृष्य शक्ति प्रयोग याना चुनाव त्याकेगु व भ्रष्टाचार यानाः ध्यबा असुर उपर याये मजिउ ।
पार्टीया निष्ठा व सिद्धान्तयात माने यानाः स्वच्छ राजनीतिक गतिविधि मार्फत् स्थानीय तहया निर्वाचनय् वनेगु शक्ति म्हो राजनीतिक पार्टीं जक नालाच्वंगु दु । पार्टी धइगु मनूतय् हुल जक मखु, विचार मूख्य जुयाः विचारं प्रभावित जुयाः राजनीतिक गतिविधिइ संलग्न जुइपिं मनूत मुनेगु थाय् राजनीतिक पार्टी खः । ध्यबा व पदया लागिं न्ह्यागु नं यायेत तयार जुइगु राजनीतिक पार्टीयात बैचारिक राजनीतिक पार्टी कथं काये मजिउ । प्रजातन्त्र वयेवं, प्रजातन्त्र पुन स्थापना जुइवं दयेकूगु गुलिं पार्टी अज्याःगु निहित स्वार्थय् तःक्यना वंगु दु । २०४६ साल लिपा स्थापना जूगु नेकपा एमाले जक मखु २०६२।६२ या जनआन्दोन लिपा स्थापना जूगु एकीकृत माओवादी शक्तिं नं अज्याःगु हे गलत लँपू ज्वन । उकिं नं अन दुने बैचारिक स्वया नं गलत शक्तिया राजनीतिया हाबी जूवनाच्वंगु दु ।
जनताया चेतना स्तर थकया उमित राजनीतिक रुपं सचेत यानाः व संगठन अप्वयेका चुनाव त्याकेगु पहल राजनीतिक पार्टीतय्सं यायेमाःगु खः । तर चुनाव वयेवं म्ये स्याना भ्वय् न्यायेकेगु, लँ दयेकागु अभिनय यायेगु, धः, डोजक, बिजुलीया थां, तार खने दया वइगु व थ्व फुक्कं जिमिसं यानागु खः न्हि धाधां चुनाव त्यकेत ध्यबा ह्वलेगु प्रबृत्ति थौं खने दयाच्वंगु दु । अझ स्थानीय तहया निर्वाचनय् विकासया खँ वइगु जुया खइ, स्वदँ न्ह्यः हे निर्माणया ज्या क्वचायेका चालू अवस्थाय् दुगु ताँयात नं थ्व इलय् मेयर वयाः उलेज्या याना वंगु घटना दोहोरो जूगु दु । थ्व तप्यंक सीदुगु चुनावी राजनीति जुल । बैचारिक व सिद्धान्तया राजनीति याइपिसं अज्याःगु फोहरी राजनीति याइमखु । चुनाव त्याकेगु लागिं वा थः हाकनं दोहोरो मेयर व वडाया नायः जुइगु लोभय् अज्याःगु घटिया ज्यात याना जुइमखु । सिद्धान्त व नैतिकता धइगु हे ल्वमंके धुंकूपिं थ्व न्हूपिं तर तःधंगु धइपिं राजनीतिक पार्टीतय्सं थौं सयेकेमाःगु नं राजनीतिक सिद्धान्त विचार मूख्य खः । मेगु चीज धइगु गौण खः ।
...
All Comments.......
Please Login/Register To Comments