- Post Date 2022-04-03 14:00:51
कृष्ण प्रजापति
नेवाः देय् दबूया न्हय्क्वःगु महाधिवेशन धरानय् तःजिक न्ह्याःगु दु । नेवाः न्ह्यलुवा व नेवाः देय् दबूया संरक्षक मल्ल के सुन्दरं तःमुँज्या उलेज्या यानादिल । वय्कलं उगु ज्याझ्वलय् थःपिसं नेवाः गौरवयात च्वन्ह्याकेगु निंतिं नेवाःतय् राष्टिय संगठन कथं नेवाः देय् दबू नीस्वनागु पुलांखँ लुमंकादिसें देय् दबूया नेतृत्व वर्गं भाषा, संस्कृति व सम्पदा संरक्षणया लागिं थःपिसं न्हापां भाषा सयेकाः मेपिंत नं स्यनेकने यायेमाःगु खँयात प्राथमिकता बिइमाः धयादिल ।
विशेष पाहां नेपाल सरकारया संघीय मामला तथा स्थानीय विकास मन्त्री राजेन्द्र श्रेष्ठं आम नेवाः समुदायया चाहना पूवंकेत नेवाः देय् दबूपाखे प्रशिक्षण व जातीय सुधारया ज्याखँ न्ह्याकेमाःगु खँय् बः बियादिल । सुनसरीया सांसद जयकुमार राई, धरानया मेयर तिलक राईपिसं नेपाःया राजनीतिक परिवर्तनय् नेवाःतय् तःधंगु योगदान दुगु खँ कनादिल । नेवाः देय् दबूया नायः नरेश ताम्रकारया सभापतित्वय् भानु चोकय् जूगु उलेज्या समारोहय् पुलांम्ह स्वास्थ्य राज्यमन्त्री तीर्थराम डंगोल, नेवाः देय् दबूया सल्लाहकारत डा. पुष्पराज राजकर्णिकार, डा. पञ्चनारायण महर्जन, पञ्चकुमारी मानन्धर, अखिल भारतीय नेवाः समाजया सूर्यनारायण श्रेष्ठ, सांसद चन्द्रप्रसाद श्रेष्ठ, सांसद सावित्री जोशी, धरानया सरला कायस्थपिसं भिन्तुना देछानादिल ।
लोककवि राजभाई जकःमिं कविता न्यंकादीगु ज्याझ्वलय् इलामया युद्धप्रसाद वैद्य, येँया शेषनारायण महर्जन, धरानया सरला श्रेष्ठ, कृष्णबहादुर श्रेष्ठपिंत वय्कःपिसं यानादीगु अमूल्य योगदानयात कयाः हना पौ लःल्हासें हनेज्या याःगु खः । ब्यवस्थापक अनिल मास्कें लसकुस यानाः माइलाबाबु द्योलां न्ह्याकादीगु उलेज्या समारोह न्ह्यः भानुचोकं थीथी सांस्कृतिक झाँकी सहिन धरान नगर चाःहिउगु खः । निन्हु यंकं न्ह्यानाच्वंगु बन्द सत्रया झ्वलय् थीथी प्रतिवेदन पारित यायेगु, न्हूगु ज्यासना पुचः ल्ययेगु नापं थीथी गतिविधि धाःसा सिद्धि नेवाः पुचःया भवनय् न्ह्यानाच्वंगु दु ।
...
All Comments.......
Please Login/Register To Comments