- Post Date 2022-04-04 15:43:02
कृष्ण प्रजापति
ख्वप मिडिया सर्कलं थुगुसी बिक्रम संवतया न्हूदँ हनेकथं विशेष ज्याझ्वः यासें नेपालभाषा संकिपाया बरिष्ठ कलाकार आशाकाजी थकुयात हनीगु जूगु दु । सोमवाः ख्वपय् जूगु ख्वप मिडिया सर्कलया मुँज्यां उगु खँ क्वछिउगु खः । न्हूदँ हने कथं ख्वप, यल व येँया विशिष्ट कलाकारतय्त ब्वनाः न्यायेकीगु बिस्काः जात्रा विशेष ज्याझ्वलय् वय्कः आशाकाजी थकु नापं ख्वपं येँ वनाः विशेष ग्वाहालि यानाच्वंपिं कलाकारतय्त नं हनीगु ज्याझ्वः दु । उकि राजेन्द्रमान शाक्य, हरिमान दिवाकर नापं आशाकाजी थकुया नां न्ह्यःने वयाच्वंगु दु ।
ख्वप मिडिया सर्कलं थ्वयां न्ह्यः नांजाःम्ह कलाकार मदनकृष्ण श्रेष्ठयात हनेज्या याःगु खः । थुकथं हे थुगुसी म्ये, हुलाप्याखं नापं आपालं कलाकारं थःपिनि विशेष प्रस्तुति न्ह्यब्वयेगु ग्वसाः तयातःगु दु । सिद्धि स्मृति भवन ख्वँह्रे यायेत्यंगु उगु ज्याझ्वःया लागिं ख्वपया थीथी विषयया कलाकार व सञ्चार क्षेत्रयात ब्वनातःगु दु । ज्याझ्वः ताःलाकेत सुरेन्द्र था श्रेष्ठयात नायः ल्ययाः छगू ब्यवस्थापन समिति नीस्वंगु दु । समितिं सम्येबजी नापं थीथी कथंया सांस्कृतिक ज्याझ्वः ताःलाकेत ग्वाहालि याइगु सर्कलया नायः राजु मानन्धरं जानकारी बियादिल । उगु मुँज्या सर्कलया नायः राजु मानन्धरया अध्यक्षताय् लिबालिबिइ जूगु खः ।
...
All Comments.......
Please Login/Register To Comments