२४ क्वःगु अन्तर्राष्ट्रिय मातृभाषा दिवसया लसताय् भिंतुना !
- Post Date 2023-02-21 06:08:39
दँय्दसं फेब्रुअरी २१ तारिखयात अन्तर्राष्ट्रिय मातृभाषा दिवसकथं हनावयाच्वंगु दु । सन् १९५२ य् तत्कालीन पूर्वी पाकिस्तान (थौंकन्हय् बंगलादेश)य् बङ्गाली भाय् (मांभाय्) न्ववाये दयेमाः धकाः माग याःबलय् अनया विद्यार्थीपिं स्याःगु घटनायात लुमंकाः थुगु दिवस हनेज्या न्ह्याःगु खः । सन् १९९९ नोभेम्वर १७ य् युनेस्को व सन् २००० स संयुक्त राष्ट्र संघं थुकियात मान्यता बी धुंकाः अन्तर्राष्ट्रिय मांभाय् दिं कथं थ्व दिंयात हनेज्या जुयावयाच्वंगु दु । विश्वया भाषिक विविधताया रक्षा व उकिया प्रवद्र्धनया निंतिं थुगु दिवस महत्वपूर्ण दिवसकथं कयातःगु दु । थुगुसी मातृभाषा दिवसय् ‘बहुभाषिक शिक्षा – शिक्षा परिवर्तनया निंतिं आवश्यकता’ धइगु नारा बियातःगु दु ।
नेपाः नं भाषिक विविधतां जाःगु देय् खः । थनया भाषिक विविधतायात संरक्षण संवद्र्धन याय्गु निंतिं नं थुगु दिवस नेपाःमिपिनि निंतिं अतिकं महत्वपूर्ण दिं खः । थ्व हे खँयात वाःचायेकाः नेवाः पत्रकार राष्ट्रिय दबूपाखें नं प्यदँ न्ह्यःनिसें थीथी ज्याझ्वःयासें थुगु दिवस हनावयाच्वनागु दु । थुगुसी नं थ्व हे २०७९ फागुन १२ गते शुक्रवाः नेपाल प्रेस काउन्सिलया सभाहलय् मातृभाषा दिवसया विशेष ज्याझ्वः याय्गु ग्वसाः दु ।
नेपाःया पत्रकारिता ख्यलय् मातृभाषा पत्रकारिताया विकास नेवाः पत्रिकापाखें हे न्ह्याःगु खः । नेवाः पूर्खा धर्मादित्य धर्माचार्यजुं थौंस्वयां ९८ दँ न्ह्यः न्ह्याकूगु ‘बुद्धधर्म’ पत्रिका हे नेपाःया न्हापांगु मातृभाषी पत्रिका खः । थुकथं नेवाः पत्रकारिता ख्यः मातृभाषा विकासया निंतिं थःगु न्हापांगु पलाःनिसें हे सक्रिय जुयाः न्ह्यज्यानाच्वंगु दु । थ्व ज्यायात नेवाः पत्रकार राष्ट्रिय दबूपाखें निरन्तर न्ह्यज्याका यंकाः मातृभाषा पत्रकारिताया विकासया निंतिं निरन्तर ज्याझ्वःत यानावं वनेगु जुइ ।
दकले लिपा हलिंया सकल मांभाय्ह्यमिपिन्त २४ क्वःगु अन्तर्राष्ट्रिय मातृभाषा दिवसया लसताय् भिंतुना देछानाच्वना ।
All Comments.......
Please Login/Register To Comments