- Post Date 2023-09-05 10:54:17
भक्तपुर
वर्ष दिनभित्र दिवङ्गत भएका आफन्तको सम्झनामा मनाइने धार्मिक सांस्कृतिक तथा ऐतिहासिक महत्व बोकेको गाईजात्रा पर्व नेवार समुदाय रहेका देशका विभिन्न ठाउँमा गाईजात्रा मनाएर थकाइ मार्दै गर्दा भक्तपुर -२ मिबाछें स्थित एभरेस्ट स्कुलमा भने गाईजात्राको रौनक यथावत थियो। विद्यालयका बस चालक चन्द्रमान धौबञ्जारकी ममतामयी आमाको १३ औं पुण्यतिथिको दिन तथा ज्ञात अज्ञात मृत जनको आत्माले शान्ति पाओस र शोक सन्तप्त परिवारमा धैर्य धारण गर्ने शक्ति मिलोस भन्ने उद्देश्यले निकालिएको गाईजात्रा (२०८०) मा नेवार समुदायका विद्यार्थीहरूको उत्साह त छँदै थियो नै जात्राको लागि ताहामचा बनाउन नूतन राई , प्रमित राईको योगदान पनि कम थिएन। मुस्कान कार्की र सिल्भिया खड्काको गाईजात्राको विषयमा दिएको व्याख्यात्मक प्रस्तुति, आयुष खड्का , सौम्यता अधिकारी, तपस्या वाग्ले , क्यारिना थापामगर, आलिया बानु आदिको घिन्ताङ्गघिसीको नाच त्यसैगरी अग्रिमा अधिकारी, रियन्सिका पोख्रेल, प्रजिता कार्की , आयुषा खड्का आदि हाकुपटासीमा सजिएको देख्दा उनीहरु गैर नेवार समुदायका हुन् भन्ने भान हुँदैन थियो। त्यसै गरी वैभव ढकाल , आरोन थिङ्ग, सौभाग्य महतो जात्रामा रमाएको देख्दा गाईजात्रा पर्व पुस्तान्तरण मात्र होईन समुदाय- समुदायमा समेत हस्तान्तरण भएको महसुस हुन्थ्यो।
२०६९ सालदेखि अनवरत रुपमा मनाउँदै आइरहेको एभरेस्ट गाईजात्रा , बुद्ध जयन्ती , जन्माष्टमी, तीज, बुवाको मुख हेर्ने, म्ह पूजा जस्ता कार्यक्रमहरुको स्मरण गर्दै संस्थापक प्रिन्सिपल श्री भक्त राजभण्डारीले हाम्रा चाडपर्व रीतिरिवाजमा रहेका असल संस्कार र मान्यतालाई जगेर्ना गर्नुपर्ने र असान्दर्भिक चलनलाई भने परिमार्जन गर्नुपर्ने कुरामा जोड दिनु भएको थियो। यस विद्यालयले बिभिन्न धर्म, समुदायमा रहेका असल संस्कारलाई सधैं सम्मान र अनुसरण गर्ने गरेको बताउनु हुँदै त्यसले मात्र विभिन्न, जातजाति समुदायका , धर्म संस्कृति , रीतिरिवाजलाई सम्मान गर्ने सहिष्णु नागरिक तयार पार्ने र त्यसले राष्ट्रिय एकतामा बल पुर्याउने विश्वास समेत ब्यक्त गर्नु भएको थियो। उक्त कार्यक्रममा कक्षा ६,७ र कक्षा ८ का विद्यार्थीहरुको सक्रिय सहभागिता रह्यो।
...
All Comments.......
Please Login/Register To Comments