कोरोना रोकथामको लागि सिद्धि गणेश साकोसद्वारा रु. २० लाख सहयोग
- Post Date 2020-10-05 10:05:01
भक्तपुर । भक्तपुरमा कोरोना भाइरस (कोभिड १९) रोकथाम र नियन्त्रण गर्न भक्तपुर नगरपालिकाले गर्दै आएको काममा सहयोगस्वरुप सिद्धि गणेश बचत तथा ऋण सहकारी संस्थाले प्रकोप व्यवस्थापन कोषमा १९ लाख ९८ हजार ५ सय ४९ रुपैयाँ आर्थिक सहयोग प्रदान गरेको छ । नगर प्रमुख सुनिल प्रजापतिलाई सिद्धि गणेश सहकारी संस्थाका अध्यक्ष राजन लाखाले सोमबार एक समारोहबीच सहयोग रकमको चेक हस्तान्तरण गर्नुभयो ।
नगर प्रमुख प्रजापतिले नगरपालिकाको आह्वानलाई स्वीकार्दै यसअघि पनि सिद्धि गणेश सहकारी तथा अन्य संघ–संस्थाहरूबाट अमूल्य साथ र आर्थिक सहयोग प्राप्त भएकोमा धन्यवाद ज्ञापन गर्नुहुँदै कोरोना रोकथाम तथा नियन्त्रणको लागि नगरपालिकाले खडा गरेको प्रकोप व्यवस्थापन कोषको आम्दानी तथा खर्चलाई पारदर्शी ढंगले नगरपालिकाको वेभसाइट ‘भक्तपुर खबर डटकम’ र नपाको प्रकाशन ‘भक्तपुर मासिक’ मार्फत सार्वजनिकीकरण गर्दै आइरहेको बताउनुभयो ।
प्रमुख प्रजापतिले दशैंको अवधिमा जात्रामा हुलहुज्जत नगरी सामान्य रुपमा सम्पन्न गर्न नगरपालिकाले दशैंसँग सम्बन्धित विभिन्न जात्राका सरोकारवालाहरूसँग चरणबद्ध रुपमा छलफल कार्यलाई अगाडि बढाइरहेको जानकारी दिनुभयो । उहाँले आफू मातहतका सहकारी संस्थाका सदस्यहरूलाई यस वर्षको दशैंमा भीड नगरी सामान्य रुपमा मनाउन आ–आफ्नो क्षेत्रबाट सहयोगको लागि आग्रह गर्नुभयो ।
सोही क्रममा नगर प्रमुख प्रजापतिले नगरपालिकाले हालै प्रकाशनमा ल्याएको २०७२ सालको भूकम्पबाट भत्केका र क्षति पुगेका सम्पदाहरूको संक्षिप्त विवरणसहित नगरपालिकाले हालसम्म सम्पन्न गरेका र निर्माणाधीन केही सम्पदाहरूको विवरण समेटिएको ‘सम्पदा पुनःनिर्माण तथा जीर्णोद्धार’ नामक फोटो पुस्तक र नगरपालिकाका केही प्रकाशनहरु अध्यक्ष लाखालाई प्रदान गर्नुभयो ।
...
All Comments.......
Please Login/Register To Comments