आफू अरुका लागि कृतिको सार
- Post Date 2024-06-02 04:59:07
डा इन्दुल केसी
स्मृति निबन्धकार निर्मला श्रेष्ठज्यूले लेख्नुभएको “आफू अरुका लागि” पुस्तक शब्द यात्रा प्रकाशनको १३५ औँ प्रकाशन पुष्पको रुपमा पाठक समक्ष आएको छ । यस पुस्तकमा दिइएको परिचयअनुसार लेखिका उच्च शिक्षा हासिल गरेकी र स्वेदश तथा विदेशहरुमा भ्रमण गरी धेरै अनुभव बटुलिएकी, लिड्ढन इन्टरनेसनल बोर्डिङ स्कुल बेनपालगायत विभिन्न नौंओटा सङ्घ सङ्स्थाहरुका सङ्स्थापक, नेपाल रेडक्रस सोसाइटीलगायत १२ ओटा सामाजिक सहकारी, राष्ट्रिय बैंक, आदि सङ्स्थाहरुमा आवद्ध सक्रिय महिला हुनुहुन्छ ।
नाला टुसाल, काभ्रेमा २०२५ सालमा जन्मनुभएकी श्रेष्ठ महिलावर्गको सशक्तीरणका लागि जीवन बिताइरहेकी अभियन्ताको रुपमा सुपरिचित छिन् । यस पुस्तकको माध्यमबाट नेपाली साहित्य क्षेत्रमा एक नारी हस्ताक्षरको रुपमा झुल्कन आउनुभएको छ ।
अधिकांश मानिस अरुका लागि होइन, आफ्नै व्यक्तिगत जीवनका लागि बाँच्तछन् तर निर्मला श्रेष्ठ आफू अरुका लागि बाँच्ने महिलाको रुपमा बाँचिरहनुभएको प्रमाणको दस्तावेज यस पुस्तकको माध्यमबाट दिनुभएको छ । यस पुस्तकमा जम्मा १९ ओटा निबन्धहरु छन् । आफे जन्मस्थान नालाको परिचय, आफूलाई जन्म दिने आमा–बुबा, परिवारजन, मित्रहरु, अभिभावक, गुरूहरुको यथोचित्र सम्मानआदरका भावनाहरु प्रचुर मात्रामा आकर्षक ढङ्गले प्रस्तुत गर्नुभएको छ ।
आफ्नो शारीरिक अवस्था “खोल्टी” हुनुपरेको र बाल मस्तिष्कमा परेको अमिट छाप, आफ्नो देब्रे गोडा कमजोर र बाङ्गो भएको, शान्त भवन अस्पतालमा अपरेसन गरिएको, पोलियोबाट पीडित, अहिले पनि सामान्य व्यक्तिसरह जुत्ता लगाउन आफू असमर्थ भएको ज्यादै दुःखदायी जीवनको व्यथालाई – “आफूलाई प्राप्त दुःखलाई पनि अवसरका रुपमा स्वीकार गर्न सकेको खण्डमा भने आफूलाई खुम्च्याएर बस्नु नपर्ने मेरो व्यावहारिक उपलब्धि हो ।” भनी गर्व गरिएको उहाँको भनाइ अरुका लागि ज्यादै महङ्खवपूर्ण प्रेरणा मान्नुपर्छ ।
भगवान कणकणमा व्याप्त हुन्छन् । हाम्रो नाङ्गो आँखाले नदेखे तापनि सबैतिर भगवान् बसेका हुन्छन् भन्ने अदृश्य दैविक भक्तिप्रति आफू इमान्दार रहेको तर कुनै मन्दिर गएर पूजा गर्न र आफ्नो मनकामना पूरा गर्ने अभिलाषामा, कुनै व्रत पूजा अहिलेसम्म गरी नसकेको यथार्थ र स्पष्ट कुरा निबन्धकारले लेख्नुभएको छ ।
रामचन्द्रजी उहाँको व्यावहारिक गुरू, जीवन बादे श्रेष्ठ महिला सशक्तीकरणमा गुरू, प्रतिभा सुवेदी सहकारी अभिभावक, भारतका प्रेमपाल रावत आफूलाई चिनाउने आध्याम्तिक गुरू तथा यो पुस्तक लेख्न आवश्यक सरसल्लाह र प्रेरणा दिनुहुने डा. इन्दुल केसीलाई मान्नुहुन्छ ।
हाम्रो देश कृषि प्रधान भएकाले आफू पनि बाँच अनि अरुलाई पनि बचाऔँ भन्ने भावनाले अर्गानिक खेतीको अभियानमा लाग्नुभएको छ । विषादी र रसायनिक मलको अन्नधुन्न प्रयोगले हाम्रो समाजमा कडा प्राण घातक रोगहरु क्यान्सर, सुगर, प्रेसर, छाला, हड्डी खिइने, नसा च्यापिने, हर्ट एट्याक सम्बन्धी विविध रोगहरु लाग्ने भएकोले कृषि प्रवद्र्धनको लागि युवा वर्गलाई अर्गानिक खेतीतर्फ लाग्नु उहाँ प्रेरकको रुपमा रहनुभएको देखिन्छ । “विदेशी होइन, स्वदेशी खोजौं, विषादी होइन, अर्गानिक नै रोजौं” भन्ने मूल नारा बोकी उद्यमशीलता विकास गर्ने निर्मला श्रेष्ठको धोको रहेको छ ।
पुस्तकको उपसङ्हारमा – आफ्नो जीवन अरुका लागि उपयोग गर्न चाहने सम्पूर्ण सचेत व्यक्तिका लागि यो पुस्तक, आफ्नो अभियान र आफ्नो जीवन समर्पित गर्नुभएको अभिव्यक्ति पोख्नुभएको छ ।
आफ्नो बाल्यकालदेखि वर्तमान समयसम्म पारिवारिक, सामाजिक, आर्थिक, शैक्षिकलगायत विविध पक्षमा सङ्घर्षशील भई आत्मविश्वासका साथ अघि बढिरहेको कुरामा आधारित आत्मकथात्मक निबन्धहरुलाई उहाँले रोचक र मार्मिक रुपमा यस पुस्तकमा प्रस्तुत गनुृभएको छ । जीवन भोगाइका क्रममा हरेक मानिसले अनेकौँ उकाली र ओराली पार गर्छ, सुखदुःख भोग्छन् । आफ्नो सीमित परिवारको स्वार्थपूर्तिका लागि जीवन व्यतीत गर्ने गर्छन् । केही नगन्य रुपमा निर्मला श्रेष्ठ जस्ता व्यक्तिहरु मात्र समाजमा देखा पर्छन्, जसले व्यक्तिगत स्वार्थका लागि होइन, समाज र राष्ट्रका लागि अभियन्ताका रुपमा जीवन अर्पण गर्छन् ।
पुस्तकको प्रकाशक शब्दयात्रा प्रकाशनका अध्याक्ष हरि मञ्जुश्रीले प्रकाशकीय लेखनमा भन्नुभएको “यो पुस्तक पढ्दा पाठकहरुलाई सकारात्मक सोच राख्ने हो भने अरुको हितमा आफूलाई समर्पित तुल्याउन सकिँदो रहेछ भन्ने प्रेरणा प्राप्त हुनेछ” भनाइ सत्य सावित हुन्छ भन्ने यो टिप्पणीकारलाई लागेको छ । इन्जिनियर रोशन मञ्जुश्री अधिकारीज्यूले आकर्षक ढङ्गमा साजसज्जा गर्नुभएको मूल्य मात्र रु.१३०।– रहेको यो पुस्तक पठ्नीय छ ।
All Comments.......
Please Login/Register To Comments